اسلام آباد(وقائع نگار خصوصی)نگران وزیر داخلہ سرفراز بگٹی نے خبردار کرتے ہوئے کہا ہے کہ جمعیت علماء اسلام ف کے سربراہ مولانا فضل الرحمان کے حوالے سے ہمارے پاس تھریٹ الرٹس ہیں۔
”پاکستان ٹائم“کے مطابق اسلام آباد میں پریس کانفرنس کرتے ہوئے نگران وزیر داخلہ سرفراز بگٹی نے کہا کہ ماضی میں بھی انتخابی مہم میں توانا آوازیں دہشت گردی کا شکار ہوئیں،مولانا فضل الرحمان کے حوالے سے بھی ہمارے پاس تھریٹ الرٹس ہیں،مولانا فضل الرحمان کی جماعت کے لوگوں پر حملے ہوئے،مولانا فضل الرحمان کو کوئٹہ آمد پر تھریٹ بارے آگاہ کیا تھا،مولانا فضل الرحمان دلیر آدمی ہیں،انہیں فول پروف سکیورٹی دی ہے،سکیورٹی کے حوالے سے چیلنجز درپیش ہیں،الیکشن ایس اوپیز،امن و امان کے حوالے سے تمام پارٹیوں سے بات چیت کر رہے ہیں۔انہوں نے کہا کہ 90 فیصد غیر قانونی طور پر مقیم افراد رضاکارانہ طور پر واپس افغانستان گئے ہیں جبکہ کوئی ایک کیس بھی خواتین یا بچوں کو ہراساں کرنے کا سامنے نہیں آیا، 10 کے قریب غیر ملکی مقیم لوگوں کی سیاسی سرگرمیوں میں ملوث ہونے کی نشاندہی ہوئی جنہیں ڈی پورٹ کیا جا رہا ہے،جو بھی غیر ملکی قانونی طور پر مقیم ہے وہ پاکستان میں سیاسی سرگرمیاں نہیں کر سکتا،کسی غیرملکی کو پاکستان میں سیاست میں حصہ لینے کی بھی اجازت نہیں،البتہ ملک بھر میں سمگلرز کے خلاف بھی کریک ڈاون جاری ہے،پاکستان میں سیاست کا حق پاکستانیوں کو ہے،سیکیورٹی سے متعلق الیکشن کمیشن کی تمام ضروریات پوری کریں گے،الیکشن کمیشن کو جتنی پیرا ملٹری فورسز کی ضرورت ہو گی،فراہم کریں گے۔
