لاہور( سٹاف رپورٹر)الخدمت بنو قابل پروگرام کے تحت لاہور میں پہلے انٹری ٹیسٹ کا انعقاد کیا گیا،جس میں ہزاروں نوجوان طلبہ و طالبات نے حصہ لیا۔اس موقع پر امیر جماعت اسلامی لاہور لاہور ضیاء الدین انصاری،الخدمت فاونڈیشن پاکستان کے نائب صدر ذکراللہ مجاہد،الخدمت وسطی پنجاب کے صدر اکرام الحق سبحانی،الخدمت لاہور کے صدر انجینئر احمد حماد رشید،الخدمت فاونڈیشن کے دیگر ذمہ داران،ملک کے نامور آئی ٹی ایکسپرٹ،اساتذہ، دانشور اور صحافی حضرات سمیت ہزاروں طلباء نے شرکت کی۔

اس موقع پر ضیاء الدین انصاری کا کہنا تھا کہ شہر لاہور کے لاکھوں نوجوان اپنے بہتر مستقبل اور نوکریوں کی تلاش میں ہیں، الخدمت فاونڈیشن بنو قابل پروگرام کے تحت نوجوانوں کو مفت آئی ٹی کورسز کروائے گی،الخدمت فاونڈیشن کے پلیٹ فارم سے شہر کے نوجوان لڑکوں اور لڑکیوں کو آئی ٹی کی مہارت کی تربیت اور تعلیم حاصل کرنے کے مواقع فراہم کریں،انتہائی پرجوش پروگرام بنو قابل کے ذریعے نوجوان چھ ماہ میں آئی ٹی کورسز میں مہارت حاصل کر کے باعزت طریقے سے روزگار کمانا شروع کر سکیں،آئی ٹی کورسز کیلئے امیدواروں کو منتخب کرنے کے لیے قابلیت جانچنے کے ٹیسٹ کا انعقاد کیا گیا جس میں ہزاروں لوگ شریک ہوئے۔انہوں نے بتایا کہ ابتدائی طور پر اس پروگرام کے تحت نوجوانوں کو ای کامرس،ڈیجیٹل مارکیٹنگ،سائبر سیکورٹی،گرافک اینڈ موشن ڈیزائن اور دیگر مہارتوں پر مبنی کورسز کروائے جا رہے ہیں۔

انجینئر احمد حماد کا کہنا تھا کہ اس پروگرام کے تحت طلباء میں تیزی سے پیداواری صلاحیتیں اور قابل قدر ملازمتیں حاصل کرنے کے ساتھ ساتھ موجودہ پروفیشنل اور افراد کو اپنے کیریئر کو آگے بڑھانے میں مدد ملے گی،الخدمت فاونڈیشن شہر کے قابل نوجوانوں کو ایسا بنا دے گی کہ نہ صرف وہ اپنی فیملی کو غربت کے اندھے کنویں سے نکالنے میں کامیاب ہو جائیں گے بلکہ وطن عزیز کے لئے زرمبادلہ کما کر قومی خدمت بھی سرانجام دیں گے۔ذکر اللہ مجاہد نے اس موقع پر کہا کہ آج اس پروگرام میں نوجوان خواب لے کر آئے ہیں اور الخدمت فاونڈیشن ان خوابوں کی تعبیر کےلیے ہر ممکن تعاون کرے گی،بنو قابل لاہور سے یقینا مایوسی کا شکار نوجوان نا صرف اپنے لیے اپنے خاندانوں کے لیے بلکہ ملک و قوم کے لیے سود مند ثابت ہوں گے۔اس موقع پر نوجوانوں نے الخدمت کا شکریہ ادا کیا اور اس عزم کا اظہار کیا کہ وہ بنو قابل لاہور کے ذریعے اپنے لیے باعزت وسائل کا باعث بنیں گے۔




