راولپنڈی(بیورو رپورٹ)پاکستان تحریک انصاف(پی ٹی آئی)کے چیئرمین بیرسٹر گوہر علی خان نے کہا ہے کہ سپریم کورٹ ہی بتا سکتی ہے انہیں کیوں لگا ہم جمہوریت کو ڈی ریل کرنا چاہتے ہیں؟ہم سپریم کورٹ کے کل کے فیصلے سے مطمئن نہیں،ہمارے تحفظات موجود ہیں،عمران خان کو سیاسی انتقام کا نشانہ بنایاجا رہا ہے،کسی صورت الیکشن کا بائیکاٹ نہیں کرینگے،سپریم کورٹ کے فیصلے کا احترام لیکن ہمیں لیول پلیئنگ فیلڈ دی جائے۔
”پاکستان ٹائم“کے مطابق اڈیالہ جیل کے باہر میڈیا سے گفتگو کرتے ہوئے بیرسٹر گوہر خان نے کہا ہے کہ توشہ خانہ کیس میں بانی پی ٹی آئی عمران خان کو جوڈیشل کر دیا گیا،یہ کیس بوگس اور سیاسی انتقام پر بنایا گیا ہے،عمران خان کی فیملی پر مقدمات بنا کر جیلوں میں ڈالا جا رہا ہے تاکہ کوئی کمپرومائز ہو،جس پارٹی نے اپنی دو حکومتیں ختم کروائیں،جس نے فری اینڈ فیئر الیکشن کے لئے قومی اسمبلی سے استعفیٰ دیئے،ہم کیوں چاہیں گے کہ الیکشن تاخیر کا شکار ہوں؟ہم ایک دن کی تاخیر بھی نہیں چاہتے،ہماری استدعا ہے کہ آپ انشورڈ کریں کہ آر اوز فیئر اینڈ فری الیکشن کرائیں گے۔بیرسٹر گوہر خان نے کہا کہ ہمارے ورکرز کو جیلوں میں بار بار نظر بند کرنے کے معاملہ کو بھی دیکھنا چاہیئے، پی ٹی آئی واحد جماعت ہے جو چاہتی ہے کہ جمہوریت کو ڈی ریل ہونے سے بچائے،اگر آپ پٹیشنرز کو نوٹس جاری کرنا شروع کر دیں گے تو انصاف کی فراہمی میں رکاوٹ ہو گی،سپریم کورٹ نے 8 فروری کو الیکشن کروانے کا کہہ کر اچھا اقدام کیا تاہم ہمیں آج بھی کنونشنز میں شرکت اور پارٹی جھنڈوں کو لہرانے کی اجازت نہیں ہے،یہ عوام کا حق ہے کہ وہ کس کو چننا چاہتے ہیں؟۔انہوں نے کہا کہ ہم نے کبھی نہیں کہا کہ ہمیں انصاف ہوتا ہوا نظر نہیں آ رہا،ہمیں جن کیسسز میں نقصان ہوا وہ اس لئے ہوا کہ وہ سنے نہیں جا رہے،دھاندلی الگ بات ہے،اگر الیکشن پراسس میں ہماری شرکت نہیں ہو گی تو الیکشن میں پری پول رگنگ کر دی گئی،پی ٹی آئی الیکشن کا کبھی بائیکاٹ نہیں کرے گی،ہم کوشش کر رہے ہیں کہ اپنے انتخابی نشان سے الیکشن لڑیں،الیکشن کمیشن نے شیڈول کے بعد لیول پلینگ فیلڈ فراہم کرنے کی یقین دہانی کرائی تھی،ہم اس فیصلہ سے مطمئن نہیں ہین،ہم چاہتے ہیں سپریم کورٹ آر اوز عدلیہ سے رکھوا دیتی،ہماری تیاری اور ہوم ورک مکمل ہے،جتنی مشکلات میں ہم مہم چلا رہے ہیں،اگر لیول پلینگ فیلڈ ملے تو دو تہائی اکثریت ہماری ہو گی۔بیرسٹر گوہر خان نے کہا کہ ہم سپریم کورٹ کے کل کے فیصلے سے مطمئن نہیں،ہمارے تحفظات موجود ہیں ،سپریم کورٹ کے فیصلے کا احترام ہے لیکن ہمیں لیول پلیئنگ فیلڈ دی جائے،پی ٹی آئی کو کٹہرے میں کھڑا نہیں کیا جا سکتا،پی ٹی آئی پر سختیاں ضرور کی جا رہی ہیں،ہماری پٹیشن میں درخواست تھی کہ ریٹرننگ افسران کو عدلیہ سے لیا جائے،سپریم کورٹ ہی بتا سکتی ہے انہیں کیوں لگا ہم جمہوریت کو ڈی ریل کرنا چاہتے ہیں؟ہم تو سپریم کورٹ میں بیٹھے رہتے ہیں کہ جمہوریت کو ڈی ریل ہونے سے بچایا جائے،انشاء اللہ سپریم کورٹ جمہوریت کو بچائے گی،بوگس کیسز کے ذریعے جسمانی ریمانڈ لینے کی کوشش کی جا رہی ہے،یہ سب کچھ سیاسی انتقام کیلئے کیا جارہا ہے،جیل ٹرائل ہو ہی نہیں سکتا،ایسے ٹرائل بنیادی انسانی حقوق کی خلاف ورزی ہے۔
