لاہور(وقائع نگار خصوصی)امیر جماعت اسلامی سراج الحق نے کہا ہے کہ جن لوگوں کا احتساب ہونا چاہیے وہ حکمرانی کے خواب دیکھ رہے ہیں،کرپشن سے کمائی گئی دولت کی بنیاد پر جعلی سٹیٹس کے حامل ٹولہ کے دن گنے جا چکے، باشعور عوام بیدار ہو گئے، 8 فروری کوظلم و نا انصافی کے سومنات پاش پاش ہو جائیں گے۔
”پاکستان ٹائم“کے مطابق منصورہ میں وفود سے گفتگو کرتے ہوئے امیر جماعت سراج الحق نے کہا کہ خاندانوں کی بادشاہت کی بجائے اب عوام کو حق حکمرانی دیا جائے،جن پارٹیوں کے اندر جمہوریت نہیں وہ ملک میں مستحکم جمہوری نظام نہیں چاہتیں،ان کے لیے سٹیٹس کو میں ہی زندگی ہے،طرفہ تماشا یہ ہے کہ پارٹیوں کا وجود پہلے قائم ہو جاتا ہے،منشور اور نظریات بعد میں تخلیق ہوتے ہیں،جماعت اسلامی ملک کی واحد سیاسی جماعت ہے،جس میں قیادت کا انتخاب شفاف جمہوری طریقے سے ہوتا ہے،ہم نے الیکشن مہم کے آغاز سے قبل انقلابی منشور دیا جس کا مقصد ملک کو اسلامی فلاحی ریاست بنانا ہے، اقتدار میں آکر منشور پر عملدرآمد یقینی بنائیں گے، عوام مہنگائی سے جان چھڑانے،کرپشن سے نجات اور امن کے قیام کے لیے ترازو پر مہر لگائیں۔انہوں نے کہا کہ جمہوری صدی میں پارلیمنٹ کے ذریعے موروثیت اور جاگیرداری نظام کو مسلط کرنا شرمناک ہے۔الیکشن مہم میں دولت کی نمائش پر پابندی لگائی جائے۔عوام کو صاف،شفاف اور آزادانہ طریقے سے اپنے نمائندے منتخب کرنے کا حق ملنا چاہیے۔جمہوریت مضبوط ہو گی تو ملک آگے بڑھے گا،امن اور خوشحالی آئے گی۔سراج الحق نے کہا کہ آج وہی لوگ بجلی مفت فراہمی کی بات کرتے ہیں جن کی حکومت میں عوام پر بجلی بم گرایا گیا،رواں برس صارفین پر بجلی گیس کی قیمتوں کی اضافہ کی مد میں 22 سو ارب کا بوجھ ڈالا گیا،آئی ایم ایف کے حکم پر ماہانہ بل کی ادائیگی نا ممکن بنا دی گئی،انہی کی حکومتوں میں پن بجلی کے کارخانے لگانے اور مقامی کوئلہ سے فائدہ اٹھانے کی بجائے آئی پی پیز سے معاہدے کیے گئے،قومی خزانہ پر ناقابل برداشت بوجھ ڈالا اور عوام کو لوٹا گیا۔سابقہ حکمرانوں کے دور میں مہنگائی اور بے روزگاری کا طوفان آیا،ان کی پالیسیوں کی وجہ سے آج عام آدمی کے لیے دووقت کی روٹی کمانا مشکل ہو گیا،عام پاکستانی میں بچوں کو تعلیم اور علاج کی سکت نہیں رہی۔وسائل پر حکمران ٹولہ قابض ہے،اسی فیصد آبادی کو بنیادی سہولیات دستیاب نہیں، پونے تین کروڑ بچے سکولوں سے باہر ہیں،لاکھوں نوجوان مایوس ہو کرملک سے باہر بھاگ رہے ہیں۔امیر جماعت نے کہا کہ جماعت اسلامی اقتدار میں آ کر 350 یونٹ تک بجلی مفت فراہم کرے گی،ہم نوجوانوں کو نوکری نہ ملنے تک روزگار الاونس دیں گے،سرکاری زمینیں بے زمین کسانوں،ہاریوں اور نوجوانوں میں تقسیم کریں گے،بلا سود مائیکرو فائنانسنک متعارف کروائیں گے،خواتین کے حقوق کی حفاظت یقینی بنائی جائے گی،ریاستی وسائل کا رخ عام آدمی کی طرف موڑیں گے،وی آئی پی کلچر کا خاتمہ ہو گا،قانون سب کے لیے برابر،بے لاگ احتساب ہو گا،جماعت اسلامی کے دور اقتدار میں عدالتوں میں قرآن کے ذریعے فیصلے ہوں گے، اسلامی نظام نافذ کریں گے، ان مقاصد کے حصول کے لیے عوام 8فروری کو ترازو پر مہر لگاکر جماعت اسلامی کے امیدواروں کو کامیاب کرائیں۔
