کراچی(بیورو رپورٹ)مسلم لیگ ن کے صدر میاں شہباز شریف کے دورہ کراچی اور متحدہ قومی موومنٹ(ایم کیو ایم )پاکستان سے ”پیار کی پینگیں“بڑھانے کی خبروں کے دوران ہی آصف زردری نے بھی میدان میں آتے ہوئے ایم کیو ایم کی دو بڑی وکٹیں گرا دی ہیں ۔
”پاکستان ٹائم“کے مطابق پاکستان پیپلز پارٹی کے شریک چیئرمین آصف زرداری سے ملاقات کے بعد ایم کیو ایم کے سابق رہنما انیس ایڈووکیٹ اور رضا ہارون اپنے ساتھیوں سمیت پیپلز پارٹی میں شامل ہو گئے۔سابق صدر آصف علی زرداری نے دونوں کو پارٹی میں شامل ہونے پر خوش آمدید کہا۔اس موقع پر شہر قائد کی ترقی،خوشحالی،قیام امن اور مفاہمتی ماحول کے فروغ کے حوالے سے چارٹر آف کراچی پر بھی تبادلہ خیال کیا گیا۔ملاقات کے دوران صدر آصف زرداری کا کہنا تھا کہ پاکستان پیپلزپارٹی کا چارٹر آف کراچی شہر قائد کے مستقبل پر دور رس اثرات مرتب کرے گا۔انہوں نے کہا کہ پاکستان پیپلزپارٹی کراچی والوں کی جماعت ہے،ہم کراچی والوں کے ساتھ مل کر شہر کی ان روشنیوں کو بحال کرنے کی جدوجہد کر رہے ہیں جنہیں امن کے دشمنوں اور نفرت کے سوداگروں نے چھین لیا تھا،شہر قائد کے باسیوں کے ووٹوں سے پاکستان پیپلزپارٹی کو وفاق میں اقتدار ملنا اس بات کے مترادف ہو گا کہ کراچی والوں کی منتخب جماعت پہلی بار وفاق پر حکومت کرے گی۔آصف زرداری نے کراچی کے مستقبل کو دبئی سے تشبیہ دیتے ہوئے کہا کہ ہم چاہتے ہیں کہ پوری دنیا سے کراچی میں سرمایہ کاری آئے اور کراچی دبئی کی طرز پر ایک ایسا معاشی حب بنے جس سے نہ صرف پاکستان کو بلکہ اہم جغرافیائی حیثیت کی وجہ سے دنیا بھر کے سرمایہ کاروں کو بھی اس شہر سے فائدہ ہو،ہم اقتدار میں آ کر کراچی سمیت ملک کے ہر شہر اور قصبے کے لیے ایسے فلاحی منصوبے لائیں گے جن سے بدترین مہنگائی کے اس دور میں عام آدمی کو ریلیف ملے گا۔
