اسلام آباد(بیورو رپورٹ) الیکشن کمیشن آف پاکستان نے قومی میڈیا کے لیے 17 نکاتی ضابطہ اخلاق جاری کر دیا، قومی میڈیا میں پرنٹ،الیکٹرانک،ڈیجیٹل میڈیا اور سوشل میڈیا انفلونسرز شامل ہیں۔
الیکشن کمیشن کی جانب سے جاری ضابطہ اخلاق کے مطابق انتخابی مہم کے دوران قومی میڈیا پاکستان کے نظریات، خودمختاری،سیکیورٹی،عدلیہ اور دیگر قومی ادادوں کی آزادی اور سالمیت کے خلاف تعصب پر مبنی رائے کی عکاسی نہیں کرے گا۔ایسے بیانات یا الزامات جن سے قومی اتحاد،امن و امان کی صورت حال کا خطرہ ہو کو نشر نہیں کیا جائے گا۔کوئی ایسا مواد شامل نہیں ہو گا جو کسی امیداوار،سیاسی جماعت پر صنف،مذہب،برادری کی بنیاد پر ذاتی حملہ ہو،خلاف ورزی پر قانونی کاروائی ہو گی۔ایک امیدوار کے دوسرے امیدوار پر الزام پر دونوں اطراف سے بیان اور تصدیق کی جائے گی۔پیمرا،پی ٹی اے،پی آئی ڈی،وزارت اطلاعات کا سائیبر ڈیجیٹل ونگ سیاسی جماعتوں اور امیداروں کو دی گئی کوریج مانیٹر کرے گا۔
الیکشن کمیشن کی جانب سے جاری اعلامیہ کے مطابق امیدوار اور سیاسی جماعتوں کی جانب سے ادائیگی کی تفصیلات پولنگ ڈے کے 10 دن کے اندر دے گا۔پیمرا،پی ٹی اے،پی آئی ڈی،وزارت اطلاعات کا سائیبر ڈیجیٹل ونگ ضابطہ اخلاق پر عملدرآمد کے لیے الیکشن کمیشن کی معاونت کرے گا۔اعلامیے کے مطابق حکومت اور قانون نافذ کرنے والے ادارے میڈیا نمائندوں اور ہاﺅسز کو تحفظ فراہم کریں گے۔قومی خزانے سے کسی سیاسی جماعت یا امیدوار کی مہم نہیں چلائی جائے گی۔ووٹرز کی آگہی کے پروگرام چلائے جائیں گے۔الیکشن کے دن سے 48 گھنٹے قبل الیکشن میڈیا مہم ختم کر دی جائے گی۔الیکشن عمل میں رکاوٹ نہیں ڈالی جائے گی،انٹرنس ایگزٹ پولز،پولنگ سٹیشن یا حلقے میں سروے سے اجتناب کیا جائے گا جس سے ووٹر متاثر ہو،صرف تسلیم شدہ میڈیا نمائندگان ایک دفعہ کیمرے کے ساتھ پولنگ عمل کی ویڈیو بنانے پولنگ سٹیشن میں داخل ہوں گے۔خفیہ بیلٹ کی ویڈیو نہیں بنائی جائے گی۔میڈیا نمائندگان گنتی بغیر کیمرا کے مشاہدہ کریں گے۔میڈیا نمائندگان الیکشن سے قبل،دوران یا بعد میں رکاوٹ نہیں ڈالیں گے۔پولنگ ختم ہونے کے ایک گھنٹے تک نتیجہ نشر نہیں کیا جائے گا۔نتائج نشر کرتے وقت بتایا جائے گا کہ یہ غیر سرکاری، نامکمل نتائج ہیں جنھیں آر او کی جانب سے اعلان تک حتمی نہ سمجھا جائے۔ضابطہ اخلاق کی خلاف ورزی پر صحافی یامیڈیا ادارے کی ایکریڈیشن ختم کی جا سکتی ہے۔
