اسلام آباد(سٹاف رپورٹر)فیض آباد دھرنا کیس میں سابق ڈی جی آئی ایس آئی جنرل(ر)فیض حمید کو دوبارہ طلب کرلیا گیا۔
”پاکستان ٹائم“کے مطابق فیض آباد دھرنا کمیشن میں سابق ڈی جی آئی ایس آئی لیفٹیننٹ جنرل(ر)فیض حمید کو آئندہ ہفتے طلب کیا گیا ہے۔ تحریک لبیک پاکستان(ٹی ایل پی)کے فیض آباد دھرنا کیس میں فیض حمید کی طلبی دوسری بار ہے۔ سابق ڈی جی آئی ایس آئی کو طلبی کا نیا نوٹس وزارت دفاع کے ذریعے بھجوایا گیا ہے۔جنرل (ر) فیض حمید آئندہ ہفتے کمیشن کے سامنے فیض آباد دھرنا کیس میں اپنا بیان ریکارڈ کرائیں گے۔ فیض حمید سابق سرکاری افسر کی حیثیت سے فیض آباد دھرنا کیس اور وجوہات پر شواہد اکٹھے کرنے میں کمیشن کی معاونت کریں گے۔واضح رہے کہ لیفٹیننٹ جنرل(ریٹائرڈ)فیض حمید کو دسمبر کے دوسرے ہفتے میں بھی طلب کیا گیا تھا تا ہم نوٹس بر وقت موصول نہ ہونے کی وجہ سے فیض حمید کمیشن کے سامنے پیش نہیں ہو سکے۔کمیشن کی جانب سے جنوری کے دوسرے ہفتے اپنی رپورٹ مکمل کیے جانے کا امکان ہے۔
