اسلام آباد(وقائع نگار خصوصی)وزیر اعظم آزاد جموں و کشمیرسردار تنویر الیاس خان نے ’یوم شہدا ‘ پر اپنے خصوصی پیغام میں کہا ہے کہ 13جولائی1931 کو 22 کشمیری مسلمانوں نے جان قربان کرکے آذان مکمل کرنے کی ایسی لازوال داستان رقم کی ہے جس کی نظیر نہیں ملتی اور جس پر آج بھی کشمیری قوم عمل پیرا ہوتے ہوئے اپنے پیدائشی حق، حق خودارادیت کیلئے مسلسل قربانیاں دے رہی ہے۔
تفصیلات کے مطابق وزیراعظم آزاد جموں و کشمیر سردار تنویر الیاس خان نے کہا کہ بھارتی مسلح افواج کے کشمیری مسلمانوں پر تاریخ انسانی کے بدترین مظالم کے باوجود کشمیری قوم کے جذبہ حریت میں کمی واقع نہیں ہوئی اور ان کی اس بلند حوصلگی اور ثابت قدمی کے نتیجہ میں مقبوضہ ریاست میں قابض بھارتی مسلح افواج کے پاو¿ں اکھڑتے دکھاتی دیتے ہیں۔انہوں نے کہا کہ کشمیری آج بھی سرینگر میں پاکستان کا پرچم لہرا کر بھارت کو للکار رہے ہیں۔جموں و کشمیر کے عوام کی آزادی کی جد وجہد ان کے اس پیدائشی اور مسلمہ حق کیلئے ہے جسے اقوام متحدہ سمیت بھارت و پاکستان نے تسلیم کر رکھا ہے۔وزیراعظم آزاد جموں و کشمیر نے کہا کہ 13جولائی 1931 سے ابتک جس قدر قربانیاں دی گئی ہیں وہ بھارت سے آزادی کی خاطر حق خود ارادیت کے حصول کیلئے تھیں جو آج بھی جاری ہیں، تحریک آزادی کشمیر، کشمیری عوام کی قربانیوں کی بدولت ایک نئے موڑ میں داخل ہو چکی ہے۔ کشمیری عوام کے عزائم کے سامنے بھارت جھکنے پر مجبور ہو چکا ہے اور قابض فوج کے حوصلے پست ہو چکے ہیں۔مسئلہ کشمیر نے عالمی رائے عامہ کو اپنی طرف متوجہ کر لیا ہے اور دنیا اس مسئلہ کے حل میں گہری دلچسپی لے رہی ہے۔
