لاہور(سٹاف رپورٹر)مرکزی مسلم لیگ کے صدر خالد مسعود سندھو نے کہا ہے کہ ہماری جماعت نے اپنا انتخابی منشور فائنل کر لیا ہے،آئندہ چند روز میں اس کی تقریب رونمائی منعقد کی جا رہی ہے،مرکزی مسلم لیگ کی مقرر کردہ ٹیم نے پاکستانی قوم کی امنگوں کے مطابق انتخابی منشور ترتیب دیا ہے،منشور میں پاکستان کو درپیش سیاسی اور معاشی چیلنجز سے نکالنے کا مکمل لائحہ عمل ترتیب دیا گیا ہے۔
”پاکستان ٹائم“کے مطابق ان خیالات کا اظہار انہوں نے مرکزی سیکرٹریٹ میں ایگزیکٹو کمیٹی کے اجلاس سے خطاب کرتے ہوئے کیا۔اس موقع پر مرکزی مسلم لیگ کے ترجمان تابش قیوم،لاہور ڈویژن کے صدر چوہدری محمد سرور،جنرل سیکرٹری انجنئیر حارث ڈار بھی موجود تھے۔خالد مسعود سندھو نے اجلاس سے خطاب کرتے ہوئے کیا کہ ہم نے لوگوں کے زخموں پر مرہم لگانی اور ملک سے محرومیوں کا ازالہ کرنا ہے،ہم نے ملک کے لیے سب کچھ قربان کیا اور ہمیشہ قوم کی خدمت کو ملحوظ خاطر رکھا ہے،آج پاکستان کا سب سے بڑا مسئلہ ملکی قیادت میں بدنیتی کا ہے،مسلم لیگ تھی تو پاکستان بنایا تھا آج مسلم لیگ آ گئی ہے جو پاکستان بچائے گی،مرکزی مسلم لیگ قوم کو مایوسی کے اندھیروں سے نکال کر روشنی کے سفر پر لائے گی۔
