لاہور(وقائع نگار خصوصی)پاکستان مسلم لیگ ن کی چیف آرگنائزر مریم نواز شریف نے کہا ہے کہ 8 فروری کو لاہور میں صرف شیر دھاڑے گا،8 فروری کے بعد ترقی کا پہیہ جہاں سے رکا تھا وہیں سے شروع کریں گے،ن لیگ نے خدمت کے ریکارڈ قائم کیے مگر جب گھس بیٹھیے آئے تو خدمت کے نشانات وہیں رہ گئے،ثاقب نثار نے لاہور کے اورنج لائن منصوبے کو کئی سال تک روک کر رکھا تو پی ٹی آئی دور میں کوڑا اٹھانے والا نہیں تھا۔
”پاکستان ٹائم“کے مطابق گجومتہ لاہور میں خطاب کرتے ہوئے مریم نواز نے کہا کہ گجومتہ والوں آپ کا بہت شکریہ کہتی ہوں آپ نے بھرپور استقبال کیا، آپ نے میرا چناو کیا جس پر آپ کی شکر گزار ہوں،شیر کو فتح یاب کراو وعدہ کرتی ہوں خدمت میں دن رات ایک کر دوں گی۔مریم نواز نے کہا کہ فیروز پور روڈ پر کہیں سپیڈو بس تو کہیں اورنج ٹرین نظر آ رہی ہے،سب نواز شریف کی خدمت کے نشان ہیں،لاہور کو بتانا چاہتی ہوں مسلم لیگ ن نے خدمت کے ریکارڈ قائم کیے جب گھس بیٹھیے آئے تو خدمت کے نشان وہیں رہ گئے،اورنج لائن کو کئی سال ثاقب نثار نے روک کر رکھا تو پی ٹی آئی دور میں کوڑا اٹھانے والا نہیں تھا۔انہوں نے کہا کہ گھس بیٹھیوں کو آٹھ فروری کو اٹھا کر لاہور سے باہر پھینکنا ہے، اقتدار میں آ کر پاکستان کی تقدیر بدلیں گے،آٹھ فروری کو لاہور میں صرف شیر دھاڑے گا،آپ کو پیشگی مبارک باد دیتی ہوں آٹھ فروری کو کوئی گھر نہیں بیٹھے گا،جتنی تیزی سے شیر پر ٹھپے لگیں گے اتنی زیادہ ترقی آئی گی۔
