اسلام آباد(مانیٹرنگ ڈیسک) سرگودھا کے قومی اسمبلی کے دو حلقوں این اے 83 اور این اے 85 میں انتخابات ملتوی کرنے کے ریٹرننگ افسران کے نوٹیفکیشن منسوخ کر دیے گئے۔
نجی ٹی وی کے مطابق چیف الیکشن کمشنر نے ہدایت جاری کر دی ہے کہ دونوں حلقوں میں انتخابات ہوں گے اور انتخابی عمل جاری رکھا جائے۔الیکشن کمیشن میں امیدوار فوت ہونے پر انتخابات ملتوی کرنے کے خلاف درخواست کی سماعت ہوئی، ن لیگ کے امیدوار ذوالفقار علی بھٹی نے بتایا کہ وفات پانے والے امیدوار کا ڈیتھ سرٹیفیکیٹ 15 جنوری کا ہے، جبکہ تحقیقات کرنے پر پتا چلا کہ صادق علی کی وفات 2 جنوری کو اور 3 جنوری کو نماز جنازہ ہوئی، اس معاملہ میں جعل سازی کی گئی ۔ڈی آر او سرگودھا نے کہا کہ انکوائری میں ثابت ہو گیا ہے کہ صادق علی کی وفات 2 جنوری کو ہوئی ، جعلی ڈیتھ سرٹیفکیٹ فراہم کیا گیا ۔چیف الیکشن کمشنر نے ڈی سی سرگودھا کوسیکرٹری یونین کونسل کے خلاف کارروائی کی ہدایت کرتے ہوئے انتخابات ملتوی کرنے کے ریٹرننگ افسران کے نوٹیفکیشن منسوخ کرنے کے احکامات جاری کر دیے ۔
