اسلام آباد(سٹاف رپورٹر)وفاقی وزیر ساجد حسین طوری کا وفاقی وزیر خارجہ بلاول بھٹو زرداری کو مراسلہ، ، ساجد حسین طوری کا بلاول بھٹو زرداری سے عراق اور ایران جانے والے پاکستانی زائرین کو سہولیات فراہم کرنے کی درخواست، زائرین کو سہولیات فراہم کرنے کی سفارشات،زائرین کے لیے ایک جامع پالیسی مرتب کرنا وقت کی اہم ضرورت ہے۔
تفصیلات کے مطابق وفاقی وزیر برائے سمندر پار پاکستانیز اور ترقی انسانی وسائل ساجد حسین طوری نے وفاقی وزیر خارجہ بلاول بھٹو زرداری کو ایک خط میں پاکستانی زائرین کو درپیش مسائل کے حل کے لیے فوری اقدامات اور زائرین کی سہولیات کے لیے ایک جامع پالیسی مرتب کرنے کی سفارش کی ہے۔ انہوں نے کہا کہ اربعین کے موقع پر ہر سال لاکھوں پاکستانی زائرین امام حسینؓ کے روزہ کی زیارت کے لئے عراق جاتے ہیں جنکو ویزوں کے حصول میں کافی مشکلات کا سامنا ہے۔ انہوں نے کہا کہ روزانہ سینکڑون کی تعداد میں خواہشمند حضرات انکے دفتر ملنے آرہے ہیں جنکو حل طلب مشکلات درپیش ہیں۔
ساجد حسین طوری نے لکھا ہے کہ بعض لوگ زیارت کے بہانے عراق اور ایران جاتے ہیں اور واپس پاکستان نہیں لوٹ آتے اور ایسے مٹھی بھر لوگوں کی وجہ سے حقیقی زائرین تکالیف اٹھا رہے ہیں۔ انہوں نے کہا کہ چونکہ ایران اور عراق کے سفارتخانوں کے لیے ایسے لوگوں کی سکروٹنی کرنا مشکل ہے کہ کون زائر ہے اور کون زیارات کے بہانے وہاں کام کرنے جا رہے ہیں اسلئے انہوں نے ویزہ دینے کا پروسیسز سخت کر دیا ہے۔
وفاقی وزیر ساجد طوری نے وزیر خارجہ بلاول بھٹو زرداری سے پرزور اپیل کی ہے کہ زائرین کے کئے ایک جامع پالیسی مرتب کی جائے جس کے تحت سالار کو تمام زائرین کو وطن واپس لانے کا پابند کیا جائے اور تمام لے جانے والے زائرین کو واپس نہ لانے والے سالاروں کے خلاف ہیومن ٹریفکنگ کی قوانین کے تحت سخت قانونی کارروائی کی جائے۔ انہوں نے اپنے خط میں لکھا ہے کہ عراقی حکومت سے چالیس سال سے کم عمر کے زائرین کے ویزوں پر عائد پابندی ختم کروائی جائے اور پاکستانی زائرین کے لئے ایران کا ملٹی انٹری ویزا دینے پر وہاں کی حکومت سے بات چیت کیجائے۔
بلاول بھٹو زرداری کے نام خط میں ساجد حسین طوری نے لکھا ہے کہ زائرین کو لے جانے والی پاکستانی بسوں کو ایران اور عراق میں داخلے کی اجازت دلوائی جائے اور زائرین کے لیے مہران یا چیلمچی بارڈر کے ذریعے عراق جانے والے زمینی روٹ بحالی کئے جائے۔دراین اثنا ساجد حسین طوری کو وزارت خارجہ نے بتایا کہ ملٹی انٹری ویزہ کے متعلق ایرانی حکام سے بات چیت ہو چکی ہے اور انقریب پاکستانی زائرین کو ایران کے ڈبل انٹری ویزے جاری کئے جائیں گے۔
