اسلام آباد(بیورو رپورٹ) پاکستان تحریک انصاف(پی ٹی آئی) کے رہنما اور نومنتخب رکن قومی اسمبلی شیر افضل خان مروت کا کہنا ہے کہ تاریخ میں پہلی بار انتخابات میں بدترین دھاندلی ہوئی، ہم نے فارم 45 اکٹھے کیے ہیں،ہماری 182سیٹیں بنتی ہیں۔
”پاکستان ٹائم“کے مطابق وفاقی دارالحکومت میں پر ہجوم پریس کنفرنس کرتے ہوئے شیر افضل مروت نے کہا کہ پی ٹی آئی پر پابندیاں تھیں، مہم نہیں کرنے دی گئی، انتخابات والے دن کیمپ نہیں لگانے دیے گئے ، الیکشن کمیشن نے بینگن اور چمٹا جیسے انتخابی نشان دیے، انتخابات میں عوام نے ہمیں مینڈیٹ دیا ہے،ہم نے فارم 45 اکٹھے کیے ہیں،ہماری 182سیٹیں بنتی ہیں۔انہوں نے کہا کہ کراچی میں ایم کیو ایم ایک نشست بھی نہیں جیتی،ہماری جیتی ہوئی نشستیں ایم کیو ایم کو دی گئی ہیں،یہ سب کیا دھرا عدالتوں کا ہے،عدالتوں میں جانے کی بجائے تب تک احتجاج کرنا چاہیے جب تک یا تو یہ سرنڈر کر دیں یا ہم،مرکز اور پنجاب میں حکومت بنانے کے لیے ہمیں اتحاد کی ضرورت نہیں۔
