لاہور(حمزہ ممتاز سے)پاکستان مسلم لیگ ن کے اجلاس کی اندرونی کہانی سامنے آ گئی،اتحادی حکومت شہباز شریف کو وزیراعظم اور مریم نواز شریف کو وزیراعلیٰ پنجاب بنایا جائے،اراکین کی تجویز پر ن لیگی اجلاس کے شرکاءنے ”ہاں میں ہاں“ ملا دی۔
”پاکستان ٹائم“کے مطابق مسلم لیگ ن کے اجلاس میں شہباز شریف وزیر اعظم اور مریم نواز وزیر اعلی پنجاب کے لئے مضبوط امیدوار بن کر سامنے آ گئے۔پارٹی ذرائع کے مطابق مسلم لیگ ن کے قائد نواز شریف کی زیرصدارت ملکی سیاسی صورت حال پر اعلی سطح کا اجلاس ہوا۔مسلم لیگ ن نے پنجاب میں صوبائی حکومت بنانے کے لئے ابتدائی خدوخال تیار کر لئے۔اجلاس میں کچھ شرکاء نے شہباز شریف کو وزیر اعظم کے طور پر امیدوار نامزد کرنے کی تجویز دی، تو باقی شرکاء نے شہباز شریف کو وزیر اعظم بنانے کی تجویز کی حمایت کرتے ہوئے ’ہاں میں ہاں‘ملا دی۔اجلاس کے دوران پارٹی قیادت نے مسلم لیگ ن کے وزارت عظمی کے امیدوار کا فیصلے کا اختیار شریف برادران پر چھوڑ دیا۔وزیر اعلی پنجاب کے لئے مریم نواز اب تک مضبوط امیدوار کے طور پر سامنے آئی ہیں۔ان کے بطور وزیر اعلی پنجاب نام پر پارٹی اجلاس میں مزید مشاورت جاری ہے۔مسلم لیگ ن شہباز شریف اور مریم نواز کے نام اپنے ممکنہ اتحادیوں کے سامنے رکھے گی۔پی پی پی،ایم کیو ایم،جمعیت علماء اسلام ف اور دیگر کی حمایت لینے کی کوشش کی جائے گی۔ مسلم لیگ ن حکومت سازی سے متعلق اپنی تجاویز اتحادیوں کے سامنے رکھ کر متفقہ فیصلے کرنے کی کوشش کی جائے گی۔حتمی فیصلہ پاکستان پیپلزپارٹی کے ساتھ مذاکرات کے فائنل راونڈ کے بعد کیا جائے گا۔اجلاس میں صدر مملکت اور چیئرمین سینیٹ کے عہدے اتحادیوں کو دینے جبکہ سپیکر قومی و صوبائی اسمبلی مسلم لیگ ن کے پاس رکھنے کی تجاویز بھی سامنے آئیں۔
