پشاور(بیورو رپورٹ)پاکستان تحریک انصاف(پی ٹی آئی)کی جانب سے خیبرپختونخوا کی وزارت اعلیٰ کے لیے 4 نام زیر غور ہیں جبکہ مسلم لیگ ن کے اجلاس میں وزیر اعلیٰ پنجاب کے لئے مریم نواز کے نام کی تجویز سامنے آ گئی ہے تاہم تحریک انصاف کی جانب سے تا حال پنجاب میں وزیر اعلیٰ کے لئے کوئی نام سامنے نہیں آیا۔
”پاکستان ٹائم“کے مطابق پی ٹی آئی) کی جانب سے خیبرپختونخوا کی وزارت اعلیٰ کے لیے 4 ناموں پر مشاورتی عمل شروع کر دیا گیا ہے۔علی امین گنڈاپور،ظاہر شاہ طورو،مشتاق غنی اور شکیل احمد وزارت اعلیٰ کی دوڑ میں شامل ہیں جبکہ ذرائع کا دعویٰ ہے کہ علی امین گنڈا پور وزیر اعلیٰ کے مضبوط امیدوار سمجھے جا رہے ہیں،دوسری طرف ظاہر شاہ طورو یا شکیل احمد کو وزیر اعلیٰ بنانے کے لیے عاطف خان اور اسد قیصر سرگرم ہیں۔ذرائع کا کہنا ہے کہ علی امین گنڈاپور کو وزیر اعلی بنانے کے لیے تیمور جھگڑا اور کامران بنگش، محمود جان کے لیے کوشاں ہیں۔اس سے قبل ایک بیان میں پاکستان تحریک انصاف (پی ٹی آئی) کے سینئر رہنما عاطف خان نے کہا تھا کہ امید ہے بانی پی ٹی آئی اچھی شہرت کے مالک کو خیبرپختونخوا کا وزیر اعلیٰ نامزد کریں گے،وہ وزیرِ اعلیٰ نامزد ہو،جو صوبے کی خدمت کر سکے،خیبرپختونخوا نے مسلسل 3 بار بانی پی ٹی آئی کو ووٹ دیا ہے۔
