لاہور(وقائع نگار خصوصی)لاہور ہائیکورٹ نے مسلم لیگ ن کے قائد اور سابق وزیر اعظم میاں نواز شریف اور سابق وزیر اعلیٰ پنجاب حمزہ شہباز شریف کو بڑی خوشخبری سناتے ہوئے قومی اسمبلی کے حلقہ این اے 130 اور پی پی 147 سے حمزہ شہباز شریف کی جیتی گئی نشست کے خلاف درخواستیں مسترد کرتے ہوئے درخواست گزاروں کو ریٹرننگ افسر (آر او) سے رجوع کرنے کی ہدایت کر دی۔
”پاکستان ٹائم “کے مطابق عام انتخابات میں این اے 130 سے سابق وزیر اعظم نواز شریف کی کامیابی کے خلاف دائر درخواست پر لاہور ہائیکورٹ میں سماعت ہوئی۔ جسٹس علی باقر نجفی نے آزاد امیدوار اشتیاق چوہدری کی درخواست پر سماعت کی۔درخواست گزار نے موقف اختیار کیا کہ نواز شریف کو مبینہ طور پر دھاندلی کے ساتھ کامیاب کروایا گیا، اس حلقے میں میں بھی امیدوار تھا، 14 امیدواروں کو صفر ووٹ ملے۔عدالت نے استفسار کیا کہ کیا آپ نے ریٹرننگ افسر کو درخواست دی،جس پر درخواست گزار نے کہا کہ عدالت میری اس پٹیشن کو ہی درخواست تصور کر لے۔عدالت نے درخواست گزار کو ریٹرنگ افسر کو درخواست دینے کی ہدایت کرتے ہوئے آج ہی درخواست پر فیصلہ کرنے کی استدعا مسترد کر دی۔یاد رہے کہ اس حلقے سے مسلم لیگ ن کے قائد نواز شریف کامیاب ہوئے ہیں جبکہ پی ٹی آئی کی حمایت یافتہ آزاد امیدوار یاسمین راشد دوسرے نمبر پر رہی تھیں۔
دوسری طرف لاہور ہائیکورٹ نے حمزہ شہباز کی صوبائی اسمبلی کی نشست پر کامیابی کے خلاف درخواست خارج کرتے ہوئے درخواست گزار کو الیکشن کمیشن سے رجوع کرنے کی ہدایت کر دی۔عام انتخابات میں صوبائی اسمبلی کے حلقہ پی پی 147 میں حمزہ شہباز کی کامیابی کے خلاف دائر درخواست پر لاہور ہائیکورٹ میں سماعت ہوئی،جسٹس علی باقر نجفی نے محمد خان مدنی کی درخواست ہر سماعت کی۔درخواست میں موقف اختیار کیا گیا کہ مجھے 1100 ووٹوں سے شکست دی گئی یے،فارم 45 کے مطابق میں جیت چکا ہوں تا ہم فارم 47 میں حمزہ شہباز کو کامیاب قرار دے دیا گیا۔درخواست میں استدعا کی گئی کہ عدالت فارم 45 کے مطابق نتائج جاری کرنے کا حکم دے۔بعدازاں عدالت نے حمزہ شہباز کی صوبائی اسمبلی کی نشست پر کامیابی کے خلاف درخواست خارج کر دی۔لاہور ہائیکورٹ نے درخواست گزار کو الیکشن کمیشن سے رجوع کرنے کی ہدایت کر دی۔
لاہور ہائیکورٹ نے پی پی 164 میں شہباز شریف سمیت دیگر امیداروں کی دوبارہ ووٹوں کی گنتی کی درخواست پر الیکشن کمیشن کے وکیل کی مہلت کی استدعا منظور کرتے ہوئے سماعت ملتوی کر دی۔پنجاب اسمبلی کے حلقہ پی پی 164 میں سابق وزیر اعظم شہباز شریف سمیت دیگر امیداروں کی دوبارہ ووٹوں کی گنتی کے لیے دائر درخواست پر لاہور ہائیکورٹ میں سماعت ہوئی۔جسٹس علی باقر نجفی نے آزاد امیدوار یوسف مئیو کی درخواست پر سماعت کی۔الیکشن کمیشن کے وکیل نے مہلت کی استدعا کردی جبکہ عدالت نے وکیل کی استدعا منظور کرتے ہوئے سماعت ملتوی کردی۔درخواست گزار کے وکیل نے موقف اپنایا کہ الیکشن کمیشن کل دوبارہ ووٹوں کی گنتی کرنے کے احکامات جاری کر چکا ہے،کل دوبارہ ووٹوں کی گنتی نہیں ہوئی۔درخواست گزار نے استدعا کی کہ عدالت الیکشن کمیشن کے احکامات کی روشنی میں ووٹوں کی دوبارہ گنتی کا حکم جاری کرے۔
