دہلی(فارن ڈیسک)بھارت میں مودی سرکار کی کسان دشمن پالیسیوں کے خلاف ملک بھر سے کسان ٹریکٹرز، گاڑیوں اور پیدل احتجاج کرتے ہوئے دارالحکومت کے لیے روانہ ہوگئے جبکہ انہیں روکنے کے لیے پولیس نے بھی کمر کس لی ہے اور ضروری اقدامات کرلیے ہیں۔ بھارتی میڈیا کے مطابق اترپردیش، ہریانہ اور پنجاب سے کسان ہزاروں کی تعداد میں نئی دہلی پہنچنا شروع ہوگئے جو مطالبات منظور ہونے تک دہلی کی سرحدوں پر دھرنا دیئے رہیں گے،کسان رہنماوں کا کہنا ہے کہ ضرورت پڑی تو وزیراعظم ہاوس کا بھی گھیراو کریں گے۔ اپنے جائز مطالبات کے لیے کسی بھی حد تک جانے کو تیار ہیں،کسانوں کے دہلی چلو مارچ سے قبل ہی بھارتی پولیس نے مظاہرین کی آمد روکنے کے لیے سنگھو، غازی پور اور ٹکری کی سرحدوں پر ناکہ بندی کر دی۔ انتظامیہ نے گاڑیوں کو روکنے کے لیے سڑکوں پر کیلیں بچھا دیں،دہلی کے اطراف کسان مارچ سے قبل ہی مودی سرکار نے 5ہزار سے زائد سیکیورٹی اہلکار تعینات کر دیئے۔ مختلف اضلاع میں دفعہ 144نافذ کردی گئی جب کہ انٹرنیٹ سروس معطل ہے۔
