کراچی(سپورٹس ڈیسک)قومی کرکٹ ٹیم کے سابق کپتان شاہد آفریدی نے ملک کی خراب صورتحال پر تبصرہ کرتے ہوئے فیصلہ سازوں سے اپیل کی ہے کہ آپس میں مل بیٹھ کر ملک کو اس ہیجانی کیفیت سے نکالیں۔
”پاکستان ٹائم“کے مطابق شاہد آفریدی کا کہنا تھا کہ عام آدمی ہر روز کی ایک نئی کہانی سے تنگ آ گیا ہے،اس کا مسئلہ مہنگائی اور بیروز گاری ہے،فیصلہ سازوں سے ہاتھ جوڑ کر التماس ہے کہ آپس میں مل بیٹھ کر ملک کو اس ہیجانی کیفیت سے نکالیں۔ان کا کہنا تھا کہ پہلے ہی بہت تماشہ بن گیا ہے اور اب یہ وطن مزید صدمے برداشت نہیں کر سکتا،خدارا اپنی آنے والی نسلوں اور ملک کیلیے سب ایک ہو جاو۔واضح رہے کہ عام انتخابات کے بعد سے ملک میں مختلف سیاسی جماعتیں نتائج میں تاخیر اور دھاندلی کے الزامات پر سراپا احتجاج ہیں،دوسری جانب عالمی میڈیا کی جانب سے کی جانے والی کوریج بھی پاکستان کی موجودہ صورتحال کو مزید دنیا تک پہنچا رہی ہے۔
