لاہور (مانیٹرنگ ڈیسک) مریم نواز کی زیر صدارت کابینہ کا پہلا اجلاس،سستے رمضان بازار اور رمضان نگہبان پیکیج کی منظوری دیدی گئی۔
پنجاب کی پہلی خاتون وزیر اعلیٰ کی زیر صدارت صوبائی کابینہ کا پہلا اجلاس ہوا ، مریم نواز شریف نے تمام وزراخصوصی طور پر سکھ برادری سے تعلق رکھنے والے پہلے وزیر رمیش سنگھ اروڑا کو وزرات کا قلم دان سنبھالنے پر مبارکباد دی۔ کابینہ نے رمضان نگہبان ریلیف پیکیج2024 کی منظوری دی،اس پروگرام کے تحت65لاکھ سے زائد ریلیف پیکیج مستحق لوگوں کے گھروں تک پہنچائے جائیں گے، مجموعی طورپر سواتین کروڑ افراد مستفید ہونگے،رمضان نگہبان ریلیف ہیمپر میں 10کلو آٹا، 2کلو چاول،2کلوچینی، 2کلو گھی اور 2کلو بیسن شامل ہوگا۔وزیر اعلیٰ نے اشیاخوردنوش کی کوالٹی کو یقینی بنانے کے لئے ضلعی انتظامیہ اور پنجاب فوڈ اتھارٹی کو ٹاسک دے دیا، اربن یونٹ اور سپیشل برانچ کی ٹیمیزکوفیلڈ سروے کرکے رمضان نگہبان ہیمپرز کی ترسیل پر رپورٹ پیش کرنے کی ہدایت جاری کر دی گئی ۔
وزیر اعلیٰ مریم نوازکی صوبائی وزراکو رمضان نگہبان پیکیج کی تقسیم کی کڑی مانیٹرنگ کرنے کی ہدایت کی اور کہا کہ رمضان المبارک میں گرانفروشوں اور ذخیرہ اندوزوں پر نظر رکھی جائے اور پرائس کنٹرول مجسٹریٹس کو باقاعدہ تربیت دی جائے۔کابینہ نے ضلعی سطح پر سستے رمضان بازار لگانے کی بھی منظوری دی،وزیر اعلیٰ نے رمضان نگہبان پروگرام کی موثر مانٹیرنگ کے لئے صوبائی وزراپر مشتمل سپیشل کمیٹی بنانے کی ہدایت بھی جاری کی ،صوبائی کابینہ کے پہلے اجلاس میں پنجاب گورنمنٹ رولز آف بزنس 2011 کے تحت وزراکو کابینہ کی کارروائی کے طریقہ کار پر تفصیلی بریفنگ دی گئی۔اجلاس میں کابینہ سٹینڈنگ کمیٹی برائے فنانس اینڈ ڈویلپمنٹ کی تشکیل کی منظوری، کابینہ سٹینڈ نگ کمیٹی برائے قانونی امور کی تشکیل کی منظوری اور کابینہ سٹینڈنگ کمیٹی برائے امن و امان کی تشکیل کی منظوری دی گئی ۔اجلاس میں صوبائی وزرا، چیف سیکرٹری، انسپکٹرجنرل پولیس،چیئرمین پلاننگ اینڈ ڈویلپمنٹ بورڈ، سینئر ممبر بورڈ آف ریونیو، چیئرمین پی آئی ٹی بی، سیکرٹری خزانہ، اطلاعات اور دیگرمتعلقہ محکموں کے افسران شریک ہوئے ۔
