وزیراعظم آزاد کشمیر نے ڈیجیٹل میڈیا کے حوالے سے بڑا اعلان کردیا

مظفرآباد(وقائع نگار خصوصی) وزیراعظم آزاد حکومت ریاست جموں وکشمیر سردار تنویر الیاس خان نے سوشل و ڈیجیٹل میڈیا کے لئے تین کروڑروپے کے فنڈز مختص کرنے کا اعلان کرتے ہوئے کہا ہے کہ اسوقت سوشل میڈیا پوری دنیا میں بے پناہ اہمیت اختیار کرچکاہے،ففتھ جنریشن وار کا مقابلہ کرنے کے لیے سوشل میڈیا پر توجہ دینا ناگزیر ہے، آزادکشمیر کے اندر سوشل میڈیا استعمال کرنے والے تحریک آزادی کشمیر کو اجاگر کرنے،ریاست کی تعمیر و ترقی، سیاحت کے فروغ اور حکومت کے سافٹ امیج کو سامنے لانے کے لیے اپنا مثبت کردار ادا کریں،سائبر کرائم کے مرتکب افراد کے خلاف سخت کارروائی کی جا رہی ہے تاکہ ڈس انفارمیشن پھیلانے والوں کو روکا جا سکے،اس سلسلہ میں ڈیٹا اکٹھا کیا جا رہا ہے،سوشل میڈیا پر کام کرنے والے افراد حکومت کا دست و بازو بنیں اور سوشل میڈیا پر افواہیں پھیلانے والوں کا سد باب یقینی بنائیں۔آزادکشمیر میں سوشل / ڈیجیٹل میڈیا کو ریگولائز کرتے ہوئے اسے میڈیا لسٹ پر لایا جا رہا ہے،اس سلسلہ میں ڈائریکٹر جنرل اطلاعات کی سربراہی میں کمیٹی قائم کر دی گئی ہے اور حکومت نے ابتدائی طور پر تین کروڑ روپے کے فنڈ بھی فراہم کر دئیے ہیں۔ہ تمام سوشل میڈیا پلیٹ فارمز جن کے سبسکرائبرز کی تعداد اچھی ہے، ان کو رجسٹرڈ کر کے ان کو اشتہارات کی مد میں فنڈز فراہم کریں گے۔
حکومت آزادکشمیر کی سوشل میڈیا پالیسی کے حوالہ سے اپنے خصوصی پیغام میں وزیراعظم سردار تنویر الیاس خان نے کہا کہ انفارمیشن کے موجودہ تیز رفتار دور میں سوشل میڈیا کی اہمیت میں بے پناہ اضافہ ہو گیا ہے،حکومت آزادکشمیر سوشل میڈیا کی طرف خصوصی توجہ دے رہی ہے جس کے لیے ابتدائی طور پر تین کروڑ روپے فراہم کیے جا رہے ہیں جو صرف سوشل میڈیا کے اداروں کوہی ملیں گے تاکہ سوشل میڈیا کو بھی کسی دائرہ کار میں لایا جا سکے، اس کے ساتھ ہی سوشل میڈیا پر ڈیفامیشن کنٹینٹ پھیلانے والوں کے خلاف بھی قانون کے تحت سخت کارروائی کی جا رہی ہے۔
وزیراعظم نے کہا کہ حکومت الیکٹرانک میڈیا کے لیے پلاننگ کر رہی ہے تاکہ الیکٹرانک میڈیا کو بھی سہولیات دی جا سکیں،آزادکشمیر کی حکومت سوشل میڈیا کے اداروں کو قدر کی نگاہ سے دیکھتی ہے،سوشل میڈیا چلانے والے ذمہ داری کا مظاہرہ کرتے ہوئے عوام کی آوا ز بنیں تاکہ آزادکشمیر کے سوشل اداروں کی لوگ مثالیں دیں۔انہوں نے کہا کہ اسوقت سوشل میڈیا کی رسائی آزادکشمیر کے ہر ڈویثرن،ضلع،تحصیل اور گاوں کی سطح تک ہے،اس لیے سوشل میڈیا حکومتی پالیسیوں کی عوام تک پہنچانے میں زیادہ تیز رفتار ٹول بن چکا ہے۔حکومت آزادکشمیر میڈیا کے اس ٹول کی اہمیت کے پیش نظر اس کی طرف خصوصی توجہ دے رہی ہے۔سوشل میڈیا چلانے والے بھی اپنی سماجی ذمہ داریوں کا احساس کریں اور عوام کی درست سمت میں رہنمائی کریں تاکہ حکومت بھی سوشل میڈیا سے رہنمائی لے کر اپنی اصلاح کر سکے لیکن یہ اسی صورت میں ممکن ہوگا جب سوشل میڈیا ریگولیٹ ہوگا اور وہ ذمہ داری سے کام کریگا۔ حکومت سوشل میڈیا کے لیے مزید وسائل فراہم کرے گی۔