پشاور(بیورو رپورٹ)وزیر اعلیٰ خیبر پختونخوا علی امین گنڈا پور نے ایسا بیان داغ دیا ہے کہ وفاقی حکومت کے ساتھ ساتھ وزیر داخلہ محسن نقوی کی پریشانی میں بھی اضافہ ہو جائے گا۔
”پاکستان ٹائم“ کے مطابق وزیراعلیٰ خیبر پختونخوا علی امین گنڈاپور سے اراکین اسمبلی اور پارٹی قائدین نے ملاقاتیں کیں جس میں 4 اکتوبر کو اسلام آباد احتجاج کے انتظامات اور تیاریوں پر تفصیلی مشاورت کی گئی۔اس موقع پر وزیر اعلیٰ خیبر پختونخوا علی امین گنڈا پور نے کہا کہ 4 اکتوبر کو ہر صورت ڈی چوک میں احتجاج کا فیصلہ کیا گیا ہے،خیبر پختونخوا کے قافلے منظم انداز میں اسلام آباد پہنچیں گے،اراکین پارلیمنٹ کے اجلاس میں فیصلہ کیا گیا ہے کہ اس بار مخصوص اور تربیت یافتہ دستہ قافلوں سے پہلے جائے گا،مشینری قافلوں سے آگے ہو گی پچھلی بار قافلوں سے پیچھے تھی،راستے بند کیے گئے تو ڈی چوک پہنچنے میں کئی دن لگ سکتے ہیں۔
علی امین گنڈا پور کا کہنا تھا کہ پر امن انداز میں جمہوری حق استعمال کریں گے،کسی کو نقصان پہنچانا مقصد نہیں،ہم کسی سے تصادم نہیں چاہتے،پولیس والے ہمارے بھائی ہیں،وفاقی حکومت ہمارا راستہ روکنے کیلئے اوچھے ہتھکنڈے استعمال کر رہی ہے،یہ آئینی ترمیم کے نام پر پی ٹی آئی کو کمزور کرنے کی کوشش کر رہے ہیں۔
