لاہور(خصوصی رپورٹر)وزیر اعلیٰ پنجاب مریم نواز شریف کا ویژن،خوش اورخوشحال کاشتکار،حکومت پنجاب نے صوبے کے کسانوں کے لئے بڑا قدم اٹھاتے ہوئے خوشخبری سنا دی۔
”پاکستان ٹائم“کے مطابق پنجاب حکومت کی جانب سے کسان کارڈ،ایگر ی میکانزیشن،انٹرن شپ کے بعد ایک اورمیگا پراجیکٹ کا آغاز ہو گیا ہے اور اس سلسلہ میں وزیر اعلی پنجاب مریم نوازشریف نے زرعی ٹیوب ویل کی سولرائزیشن پراجیکٹ کا افتتاح کر دیا۔وزیر اعلیٰ مریم نوازشریف نے زرعی ٹیوب ویل سولرائزیشن پراجیکٹ کیلئے قرعہ اندازی کی، زرعی یٹوب ویل سولرائزیشن پراجیکٹ کی قرعہ اندازی میں سب سے پہلا نام اٹک کے محمد نواز کا نکلا۔وزیر اعلیٰ مریم نواز شریف نے پنجاب کے ضلع ناروال کے خوش نصیب کاشتکاروں کی لسٹ چیک کی،قرعہ اندازی کے ذریعے پہلے فیز میں پنجاب بھر میں 8 ہزار ٹیوب ویل شمسی توانائی پر منتقل کیے جائیں گے۔عام کاشت کار کو سولر ٹیوب ویل سے اوسط روزانہ دس ہزار سے زائد اور ماہانہ سوا تین لاکھ سے زیادہ بچت ہو گی جبکہ حکومت پنجاب زرعی ٹیوب ویل کیلئے 10کلو واٹ کے سولر سسٹم کیلئے 5 لاکھ سبسڈی دے گی،15 کلو واٹ سولر سسٹم کیلئے ساڑھے 7 لاکھ اور 20 کلو واٹ سولر سسٹم کیلئے 10 لاکھ روپے سبسڈی دی جائے گی۔قرعہ اندازی میں کامیاب کاشتکار متعلقہ ضلع کے وینڈر کا انتخاب کر کے سولر سسٹم کی تنصیب کرائیں گے۔پنجاب میں چیف منسٹر زرعی ٹیوب ویل سولرائزیشن پراجیکٹ کیلئے 5 لاکھ 30 ہزار سے زائد کاشتکاروں نے اپلائی کیا ،3 لاکھ 85 ہزار کاشتکار چیف منسٹر زرعی ٹیوب ویل سولرائزیشن پراجیکٹ کی قرعہ اندازی کے اہل قرار پائے،87 فیصد ڈیزل پر چلنے والے زرعی ٹیوب ویل اور13فیصد بجلی سے چلنے والے زرعی ٹیوب ویل شمسی توانائی پر منتقل ہوں گے۔
وزیر اعلیٰ مریم نواز شریف نے پہلے فیزمیں زرعی ٹیوب ویل کی سولرائزیشن جون تک مکمل کرنے کا ہدف مقرر کرتے ہوئے کہا کہ زرعی ٹیوب ویل کی سولرائزیشن کا منصوبہ کاشتکاری میں انقلاب لائے گا،زرعی ٹیوب ویل کی سولرائزیشن سے فصل کی پیداواری لاگت میں نمایاں کمی آئے گی اور کاشتکار خوشحال ہو گا۔وزیر اعلیٰ پنجاب مریم نواز شریف کا کہنا تھا کہ کسان کارڈ،ایگری کلچرمیکائزیشن،ایگری انٹرن شپ سمیت ہر پراجیکٹ کاشتکار کیلئے آسانیاں اور بہتری لا رہا ہے۔
