لاہور(وقائع نگار خصوصی)مہنگائی میں کمی کے دعووں پر مسلم لیگ ن کے صدر اور سابق وزیراعظم میاں نواز شریف نے خوشی کا اظہار کرتے ہوئے کہا ہے کہ مہنگائی کی رفتار میں کمی کا آنا معاشی بہتری کا اشارہ ہے۔
”پاکستان ٹائم‘ کے مطابق مسلم لیگ ن کے صدر نواز شریف اور وزیر اعلی پنجاب مریم نواز سے پنجاب اسمبلی کے ارکان نے ملاقات کی،گوجرانوالہ،نارووال،سیالکوٹ کے اضلاع سے تعلق رکھنے والے ارکان پنجاب اسمبلی ملاقات کرنے والوں میں شامل تھے۔ملاقات میں ملک کی مجموعی صورتحال،پنجاب میں ترقیاتی عمل اور عوام کی خدمت کے منصوبوں پر غور کیا گیا۔میاں نواز شریف نے اس موقع پر گفتگو کرتے ہوئے کہا کہ مہنگائی کی رفتار میں کمی کا آنا معاشی بہتری کا اشارہ ہے،سٹاک ایکسچینج کی بلندی کاروباری اور سرمایہ کار برادری کے اعتماد کی جھلک ہے،ترقی کی طرف سفر کی رفتار کا بڑھنا خوشگوار تبدیلی کی آمد کی علامت ہے،پاکستان کو جس پستی کی طرف دھکیل دیاگیا تھا اس میں ٹھہراو آنا خوش آئند ہے۔نواز شریف نے کہاکہ وزیر اعظم شہباز شریف وفاق میں بڑی محنت سے کام کر رہے ہیں،اللہ تعالی کا فضل ہو رہا ہے،مریم نواز وزیر اعلی سے بڑھ کر پنجاب میں ایک ماں اور بیٹی کے جذبے سے کام کر رہی ہے،اللہ تعالی بھی ان کا ہاتھ پکڑتا ہے جو نیک نیتی اور محنت سے اس کی مخلوق کی خدمت کرتے ہیں۔اس موقع پر ارکان اسمبلی نے پنجاب میں ترقیاتی کاموں اور عوامی منصوبوں پر وزیر اعلی مریم نواز شریف کو خراج تحسین پیش کرتے ہوئے کہا کہ ”میاں صاحب“آپ مریم نواز جیسی بہادر اور لائق بیٹی پر جتنا فخر کریں کم ہے،میاں نواز شریف کا نام لگا ہے تو برکت ہی برکت ہے،مریم نواز شریف ایک سال میں ہر طبقے کی بحالی کے پرگرام لائی ہیں،لوگ دعائیں دے رہے ہیں،ستھرا پنجاب،کسان کارڈ،سکالرشپ پروگرام،سڑکوں کی تعمیر و بحالی،دھی رانی پروگرام،بنیادی اور دیہی مراکز اور صحت کے پورے نظام کی اپ گریڈیشن کے کام عوام کی خدمت کے نشان ہیں ۔وزیر اعلی مریم نواز نے ارکان پنجاب اسمبلی سے اظہار تشکر کرتے ہوئے کہاکہ قائد نواز شریف کی بیٹی ہونے اور وزیر اعظم شہباز شریف کی مثالی عوامی خدمت کے حوالے سے زیادہ ذمہ داری محسوس کرتی ہوں،آپ سب کی راہنمائی اور اعتماد ہی ہماری قوت اور کامیابی کی کلید ہے،عوامی خدمت کے معیار اور رفتار کے ذریعے مسلم لیگ ن کی ماضی کی روایت کو آگے بڑھا رہے ہیں۔اجلاس میں قومی اور صوبائی سطح پرمعاشی ترقی،عوامی فلاح کے منصوبوں سمیت دیگر شعبوں میں مستقبل کی حکمت عملی پر مشاورت بھی ہوئی۔پارٹی کے سینئر رہنما اور وزیر دفاع خواجہ آصف،سینیٹر پرویز رشید، رانا ثناءاللہ،پنجاب کی سینئر وزیر مریم اورنگزیب اور راشد نصر اللہ بھی اجلاس میں موجود تھے۔
