کراچی(بیورو رپورٹ)عالمی و مقامی مارکیٹ میں سونے کی قیمت ایک بار پھر تاریخ کی نئی بلند ترین سطح پر پہنچ گئی،ملک میں آج سونے کی فی تولہ قیمت یکدم 5 ہزار 300 روپے بڑھ کر ملکی تاریخ میں پہلی بار 3 لاکھ روپے کے قریب پہنچ گئی،سرمایہ کاروں کی سونے میں انویسٹمنٹ کر کے اپنے سرمائے کو ڈی ویلیوایشن سے محفوظ بنانے کے بڑھتے ہوئے رحجان سے بین الاقوامی اور مقامی سطح پر سونے کی قیمتیں تاریخ کی بلند ترین سطح پر پہنچ گئی ہیں۔
آل پاکستان جیمز اینڈ جیولرز ایسوسی ایشن کے مطابق ملک بھر میں سونے کی قیمتیں بلندی پر پہنچنے کا سلسلہ آج بھی جاری رہا،جس کے بعد 24 قیراط کا حامل خالص فی تولہ سونے کی قیمت میں 5 ہزار 300 روپے کا اضافہ ہوا،جس کے بعد سونے کی فی تولہ قیمت 2 لاکھ 99 ہزار 600 روپے کی بلند ترین سطح پر پہنچ گئی۔اسی طرح 24 قیراط 10 گرام سونے کی قیمت 4 ہزار 158 روپے بڑھ کر 2 لاکھ 56 ہزار 859 روپے ہو گئی جبکہ 22 قیراط 10 گرام سونے کے دام 2 لاکھ 35 ہزار 454 روپے ریکارڈ کیے گئے۔ادھر فی تولہ چاندی کی قیمت 36 روپے کے اضافے سے 3350 روپے اور 10 گرام چاندی کی قیمت بھی 31.50 روپے کے اضافے سے 2872 روپے کی سطح پر آ گئی ہے۔ایسوسی ایشن نے رپورٹ کیا کہ عالمی مارکیٹ میں سونے کی فی اونس قیمت 53 ڈالر اضافے سے 2 ہزار 868 ڈالر ہو گئی۔
واضح رہے کہ گزشتہ روز(4 فروری)بھی ملک بھر میں سونے کی قیمتیں بلندی پر پہنچنے کا سلسلہ جاری رہا تھا اور فی تولہ قیمت ایک ہزار 900 روپے بڑھ کر 2 لاکھ 94 ہزار 300 روپے تک جا پہنچی تھی۔اس سے قبل 31 جنوری کو سونے کے نرخ 2 لاکھ 91 ہزار 800 روپے کی نئی بلند ترین سطح پر ریکارڈ کیے گئے تھے اور یہ سلسلہ یکم فروری(بروز ہفتہ)کے بعد گزشتہ روز(3 فروری)کو بھی جاری رہا تھا جب فی تولہ دام 2 لاکھ 92 ہزار 400 کی بلندسطح پر پہنچے تھے۔
