سیالکوٹ(بیورو رپورٹ)وفاقی وزیر دفاع اور پاکستان مسلم لیگ ن کے مرکزی رہنما خواجہ آصف نے پاکستان تحریک انصاف(پی ٹی آئی)پر کڑی تنقید کرتے ہوئے کہا ہے کہ ٹرمپ آ گیا مگر بانی پی ٹی آئی کا کچھ نہیں بن سکا،تحریک انصاف احتجاج اور فساد کی سیاست کر رہی ہے،آج ملک میں یومِ ترقی منایا جا رہا ہے جبکہ پی ٹی آئی یومِ سیاہ منا رہی ہے،چیمپیئنز ٹرافی کے آغاز پر ہی احتجاج کا پروگرام بنایا گیا،ہمیں پرامن جلسوں پر کوئی اعتراض نہیں،جلسوں کا انعقاد پر امن طریقے سے بھی ہو سکتا ہے،ان کی فائرنگ سے ان کے اپنے ہی کارکنان جاں بحق ہوتے ہیں۔
”پاکستان ٹائم“کے مطابق سیالکوٹ میں تحریک انصاف کوآڑے ہاتھوں لیتے ہوئے خواجہ آصف نے کہا کہ جب بھی پاکستان کی عزت کا موقع آتا ہے،فسادی ٹولہ سر اٹھا لیتا ہے،عالمی سطح پر پاکستان کے تعلقات میں اضافہ ہو رہا ہے مگر پی ٹی آئی عالمی ایونٹس کی توقیر میں کمی کرنے کی کوشش کر رہی ہے، 9 مئی اور 26 نومبر جیسے واقعات کو دہرانے کی اجازت نہیں دی جائے گی،پی ٹی آئی کے رہنما علی امین گنڈا پور نے خود تسلیم کیا کہ ان کے 99 فیصد مطالبات پورے ہو چکے ہیں تو پھر احتجاج کا جواز کیا ہے؟پی ٹی آئی کا رویہ پاکستان کے مفادات کے لیے نقصان دہ ہے اور چیمپئنز ٹرافی کو سبوتاژ کرنے کے لیے فسادی ٹولہ متحرک ہو رہا ہے،چیمپیئنز ٹرافی کے آغاز پر ہی احتجاج کا پروگرام بنایا گیا۔خواجہ آصف نے کہا کہ حکومتی کوششوں سے معیشت مستحکم ہو چکی ہے،پالیسی ریٹ 22 سے کم ہو کر 12 فیصد پر آ گیا ہے،مہنگائی کی شرح کم ہو رہی ہے اور اسٹاک مارکیٹ 1,18,000 کی نفسیاتی حد تک پہنچ چکی ہے، حکومت عوامی فلاح کے منصوبوں پر توجہ دے رہی ہے،بجلی کے نرخوں میں کمی متوقع ہے جبکہ دہشت گردوں کے خاتمے اور چینی کی سمگلنگ روکنے کے لیے بھی اقدامات کیے جا رہے ہیں۔
