لاہور(سٹاف رپورٹر)8 فروری کو ہونے والے انتخابات کا ایک سال مکمل ہونے پر جہاں پاکستان تحریک انصاف”یوم سیاہ“ منا رہی ہے وہیں پر وزیر اعلیٰ پنجاب مریم نواز شریف نے ایسا پیغام جاری کر دیا ہے کہ پی ٹی آئی اور اپوزیشن جماعتیں تلملا اٹھیں گی۔
”پاکستان ٹائم “کے مطابق وزیر اعلیٰ پنجاب مریم نواز شریف نے انتخابات کے انعقاد کا ایک سال مکمل ہونے پر اظہار تشکر کرتے ہوئے صدر پاکستان مسلم لیگ ن نواز شریف اور وزیر اعظم شہباز شریف کوخراج تحسین کیا اور کہا کہ الحمد اللہ قائد نواز شریف کے ویژن اور وزیر اعظم شہباز شریف کی قیادت میں ترقی اور خوشحالی کا سفر خوش آئند ہے،معاشی مشکلات اور سیاسی عدم ا ستحکام کے باوجود ناممکن کو ممکن بنانے پر وزیر اعظم شہباز شریف مبارک باد کے مستحق ہیں۔مریم نواز شریف کا کہنا تھا کہ برآمدات اور ترسیلات میں اضافہ،مہنگائی میں کمی،معاشی معجزے کے مترادف ہے،پاکستان میں شنگھائی تعاون تنظیم کا سربراہی اجلاس دہائی کا سب سے بڑا واقعہ ہے،شرح سود اور کرنٹ اکاونٹ خسارے میں کمی سے معیشت بہتر ین ٹیک آف کر رہی ہیں،پاکستان سٹاک ایکسچینج کا خطے کی سب سے تیز ی سے بڑھنے والی مارکیٹ بننا تاریخی امر ہے۔
وزیر اعلیٰ پنجاب نے کہا کہ ثابت ہوگیا مسلم لیگ ن کے دور حکومت میں ہی معیشت ترقی کرتی اور عوام خوشحال ہوتی ہے،پاکستان کی معیشت میں بہتری آنے سے غریب آدمی کے گھر میں خوشحالی آئے گی،پنجاب واحد صوبہ ہے جہاں اشیائے خورد و نوش میں مہنگائی کی شرح کم ہے،کاشتکار او رعام آدمی آنے والی ترقی اور خوشحالی کے دنوں کو محسوس کر رہے ہیں۔وزیر اعلیٰ پنجاب مریم نواز شریف نے ملک میں کرکٹ ٹیموں کی آمد اورسہ ملکی ٹورنامنٹ کے آغاز پر اظہار تشکر اور کئی دہائیوں کے بعد پاکستان میں غیر ملکی کرکٹ سیریز ٹرافی کے انعقاد کا خیر مقدم کیا جبکہ سہ ملکی کرکٹ ٹورنا منٹ کے آغاز پر شائقین کرکٹ ،وزیر اعظم شہبازشریف،چیئرمین پی سی بی اور پوری ٹیم کو مبارکباد پیش کی۔وزیر اعلی مریم نواز شریف نے پاکستان،نیوزی لینڈ اور جنوبی افریقہ کی ٹیموں کے لئے نیک تمناوں کا اظہار کرتے ہوئے کہا کہ کھیل کے میدان آباد کرنے کے عزم کی جیت ہے،کرکٹر کو قذافی سٹیڈیم میں دیکھ کر ہونے والی خوشی بیان نہیں کر سکتی،اللہ تعالی کے فضل و کرم سے کرکٹ کے میدانو ں کی رونقیں لوٹ رہی ہیں،کھیل اور میلے پنجاب کی ثقافتی پہچان ہیں،بحالی دیکھ کر خوشی ہوئی،کھیل انسان کو صلاحیتو ں کے اظہار کے بھرپور مواقع فراہم کرتے ہیں۔
