پشاور(بیورو رپورٹ)پاکستان تحریک انصاف(پی ٹی آئی)کے مرکزی رہنما اور سابق وزیر خیبر پختونخوا حکومت شوکت یوسفزئی نے ایسا اعتراف کر لیا ہے کہ اڈیالہ جیل میں قید پارٹی چیئرمین عمران خان کی پریشانیوں میں مزید اضافہ ہو جائے گا۔
“پاکستان ٹائم“کے مطابق پاکستان تحریک انصاف کے سینئر رہنما شوکت یوسف زئی نے پارٹی میں ڈسپلن کی شدید کمی کا اعتراف کرتے ہوئے قیادت سے مطالبہ کیا کہ فوری طور پر تنظیمی نظم و ضبط قائم کیا جائے،جو افراد سستی شہرت کے لیے پارٹی کو استعمال کر رہے ہیں،ان کے خلاف سخت کارروائی کی جائے۔شوکت یوسف زئی نے صوابی جلسے میں پیش آنے والے واقعات کو افسوسناک قرار دیتے ہوئے کہا کہ پارٹی رہنماوں کو اپنی ذمہ داریوں کا احساس کرنا چاہیے،عمران خان جیل میں ہیں اور ہم یہاں عہدے بانٹنے میں مصروف ہیں جو کہ پارٹی کے لیے نقصان دہ ہے۔گورنر پنجاب سردار سلیم حیدر خان کے فارم 47 سے متعلق بیان پر تبصرہ کرتے ہوئے شوکت یوسف زئی نے کہا کہ اس انکشاف نے حکومت کی حقیقت کھول کر رکھ دی ہے،عطا تارڑ فارم 47 کے ایم این اے ہیں لہٰذا انہیں وزارت سے ہٹایا جائے اور ان کے خلاف تحقیقات کی جائیں۔وزیر اعظم شہباز شریف کے دعوے پر ردعمل دیتے ہوئے شوکت یوسف زئی نے کہا کہ وہ ایک سال میں اندھیرے سے اجالے کا سفر مکمل ہونے کی بات کر رہے ہیں مگر یہ اجالا کہیں نظر نہیں آ رہا۔
