پشاور(بیورو رپورٹ)وزیر اعلیٰ خیبر پختونخوا علی امین گنڈاپور نے پاکستان تحریک انصاف(پی ٹی آئی )کے بانی چیئرمین عمران خان کی جانب سے کی جانے والی اپیل مسترد کرتے ہوئے اوورسیز پاکستانیوں کے نام پیغام جاری کر دیا اور کہا کہ ہمیں اپنے ادارے کو مضبوط کرنا چاہیے،اوورسیز پاکستانی بینک آف خیبر کے ذریعے پیسے بھجوائیں۔
”پاکستان ٹائم“کے مطابق بینک آف خیبر کی جانب سے ملک میں اسلامی بینکنگ سروس کا آغاز کر دیا گیا ہے،جس کا افتتاح وزیر اعلیٰ خیبر پختونخوا نے کیا۔تقریب سے خطاب کرتے ہوئے وزیر اعلیٰ علی امین گنڈاپور نے کہا کہ مالیاتی نظام کے لیے بینک آف خیبر نے بڑا اقدام اٹھایا ہے،ملک کو بغیر سودی نظام کی ضرورت ہے،بینک آف خیبر مالیاتی نظام میں اپنی کارکردگی منوا رہا ہے،کسی بھی ملک یا صوبے کے لیے معاشی نظام منظم ہونا چاہیے،اپنے اداروں کو مضبوط کرنا چاہیے،اوورسیز پاکستانی بینک آف خیبر کے ذریعے پیسے بھجوائیں،جو بھی صوبے میں سرمایہ کاری کرنا چاہ رہا ہے،حکومت انہیں مراعات دے گی،ہمارا صوبہ آئی ایم ایف کے حوالے سے اہداف پورے کر رہا ہے،اقدامات سے لوگوں کا بینک آف خیبر اور حکومت پر اعتماد بڑھے گا۔
وزیر اعلیٰ علی امین گنڈاپور کا کہنا تھا کہ کرم کا معاملہ کافی پرانا ہے،بیرونی قوتیں مسئلہ بنا رہی ہیں،بیرونی قوتیں انویسٹمنٹ کر رہی ہیں،ہم نے جرگے کے ذریعے کوششیں کی ہیں،اب ٹھوس اقدامات اٹھائیں گے،سی سی ٹی وی کیمروں اور چیک پوسٹس کے لیے 2 ارب روپے جاری کر رہے ہیں،ہم پیچھے نہیں ہٹیں گے،دہشت گردوں کو چھوڑیں گے نہیں،جو بھی فساد پھیلا رہا ہے اب چھوریں گے نہیں،اس ناسور کو جڑ سے اکھاڑیں گے۔اس موقع پر تقریب سے خطاب کرتے ہوئے چیئرمین بینک آف خیبر اکرام اللہ خان نے بتایا کہ پورے صوبے اور ملک دیگر شہروں میں بھی اسلامی برانچز کھولی جائیں گی،سٹیٹ بنک آف پاکستان کی ہدایات پر اسلامی بینکنگ برانچز کی تعداد بڑھائی جارہی ہے۔
