بھارت سے ذلت آمیز شکست،جیل میں بیٹھے عمران خان بھی پھٹ پڑے

راولپنڈی(بیورو رپورٹ)پاکستان تحریک انصاف(پی ٹی آئی)کے بانی چیئرمین اور سابق وزیر اعظم عمران خان نے قومی کرکٹ ٹیم کی ناقص کارکردگی پر شدید غصے کا اظہار کرتے ہوئے کہا ہے کہ جب عہدوں پر سفارشی لوگوں کو بٹھایا جائے گا تو کرکٹ تباہ ہو گی،چیئرمین پی سی بی محسن نقوی کو جس عہدے پر بھی بٹھایا گیا،اس نے بیڑہ غرق کیا،وہ استعفیٰ دے۔
”پاکستان ٹائم“کے مطابق بانی پی ٹی آئی سے ملاقات کے بعد ان کی ہمشیرہ علیمہ خان نے میڈیا سے گفتگو کرتے ہوئے بتایا کہ عمران خان کو آج سب سے زیادہ غصہ کرکٹ پر تھا،عمران خان نے آئی سی سی چیمپئنز ٹرافی میں پاکستان کا بھارت کے خلاف میچ پی ٹی وی پر دیکھا،میچ ہارنے کی وجہ سے بانی نے سارا غصہ آج کرکٹ پر اتارا۔میچ ہارنے پر عمران خان کو بڑا دکھ تھا،بانی پی ٹی آئی نے کہا کہ جب سفارشی لوگوں کو عہدوں پر بٹھایا جائے گا تو کرکٹ تباہ ہو گی، محسن نقوی کو پہلے چیف منسٹر لگایا،اس نے ظلم کیا،محسن نقوی کو وزیر داخلہ لگایا،اس نے ظلم کیا،محسن نقوی کو جس عہدے پر لگایا،اس نے بیڑا غرق کیا،پاکستان میں اتنے عہدے کسی شخص کے پاس نہیں جتنے محسن نقوی کے پاس ہیں،اتنی بری کارکردگی پر عزت دار آدمی مستعفی ہو جاتا ہے لیکن محسن نقوی مستعفی نہیں ہو گا،محسن نقوی سے پوچھا جائے اس کو کرکٹ کا کیا تجربہ ہے؟۔
عمران خان نے کہا میرے متعلق صرف پارٹی کے عہدیدار بات کریں،غلط فہمیاں پیدا کرنے کے لیے خبر نکالی گئی کہ عمران خان بے ہوش کر گر پڑے۔علیمہ خان نے کہا کہ بانی پی ٹی آئی اس بات پر ہنسے ہیں،ان کی صحت بالکل ٹھیک ہے،شکر ہے عمران خان کی ہفتہ والے دن اپنے بچوں سے بات ہوئی تھی،ہم نے بچوں سے بات کی تو ہمیں تسلی ہوئی عمران خان ٹھیک ہیں،قاسم خان سوری ملک سے باہر ہیں،ان کو کیا پتا،ذرائع سے خبریں چلانا اور بالمشافہ ملاقات میں بہت فرق ہوتا ہے۔دوسری جانب اڈیالہ جیل کے باہر میڈیا سے گفتگو کرتے ہوئے عمران خان کے وکیل فیصل چوہدری ایڈووکیٹ نے کہا کہ بانی چیئرمین پی ٹی آئی سے 10منٹ کی مختصر ملاقات ہوئی،انہوں نے چیئرمین پی سی بی محسن نقوی کا استعفیٰ مانگا ہے،ملکی کرکٹ محسن نقوی کی وجہ سے تباہ ہوئی،عمران خان نے کہا شیر افضل مروت کو کافی دفعہ وارننگز دی گئیں لیکن انہوں نے اپنا طرز عمل ٹھیک نہیں کیا،شیر افضل مروت کو اسی کے مطابق ڈیل کیا جائے گا۔انہوں نے کہا کہ عمران خان کی صحت کے حوالے سے پوسٹس درست نہیں،اتنا انتظار کرنے کے باوجود ابھی بھی وکالت پر دستخط کر کے نہیں دیے گئے،وکالت نامے 7 دن سے دیے ہیں،سمجھ نہیں آتی یہ وکالت نامے کیوں نہیں دیتے،وکالت ناموں پر کہا گیا ہے کہ رجسٹرار جوڈیشل ابھی آئیں گے تو وہ دستخط کریں گے۔