لاہور(وقائع نگار خصوصی)وزیراعلیٰ مریم نواز شریف کی کاوش نے معصو م بچوں کے چہروں پر مسکراہٹیں بکھیر دیں ،لاہور کے چلڈرن ہسپتال میں بون میرو ٹرانسپلانٹ کے 150کامیاب آپریشن کیے گئے،بون میروٹرانسپلانٹ آپریشن پر 42 لاکھ سے زائد اخراجات حکومت پنجاب نے ادا کیے،وزیر اعلیٰ پنجاب مریم نواز نے صوبے میں جلد بون میرو ٹرانسپلانٹ کارڈ کا اجرا کرنے کا بھی اعلان کر دیا۔
”پاکستان ٹائم“ کے مطابق لاہور چلڈرن ہسپتال پاکستان بھر میں بون میروٹرانسپلانٹ آپریشن کرنے والا پہلا سرکاری ادارہ بن گیا ہے۔چلڈرن ہسپتال کے کینسر وارڈ میں ایک سال میں 2000 مریضوں کا علاج کیا گیا۔چلڈرن ہسپتال کی کینسر وارڈ او پی ڈی میں 25 ہزار سے زائد کینسر کے مریض بچے مستفید ہوئے۔چلڈرن ہسپتال میں بون میرو ٹرانسپلانٹ آپریشن میں کامیابی کا تناسب عالمی معیار کے مطابق 89 فیصدسے زائد رہا ہے۔سندھ،بلوچستان اور دیگر صوبوں کے مریض بچے بھی بون میرو ٹرانسپلانٹ کرانے والوں میں شامل ہیں۔افغانستان سے آنے والے مریض بچوں کی چلڈرن ہسپتال لاہور میں فری بون میروٹرانسپلانٹیشن کی گئی۔وائس چانسلر یونیورسٹی آف چائلڈ ہیلتھ سائنسز ڈاکٹر مسعود صادق نے بتایا کہ وزیر اعلیٰ مریم نواز شریف کی ہدایت پربون میروٹرانسپلانٹ کے کسی مریض کو علاج کے لئے انکار نہیں کیا جاتا۔بون میرو ٹرانسپلانٹ کے مریض بچوں کو آپریشن کے بعد ادویات بھی مفت دی جاتی ہے۔بون میروٹرانسپلانٹ کے ہر بچے کا ہر 15دن کے بعد فالو اپ چیک بھی کیا جاتا ہے۔وزیر اعلیٰ مریم نواز شریف کا کہنا ہے کہ جلد بون میرو ٹرانسپلانٹ کارڈ کا اجرا کر دیا جائے گا۔ہر بچہ میرے لئے اپنے بچوں سے بھی بڑھ کر ہے۔مفت علاج ہر مریض بچے کا حق ہے،ریاست اپنا فرض ضرور نبھائے گی۔وزیر اعلیٰ مریم نواز شریف نے کہا کہ ٹرانسپلانٹیشن کارڈ کے بعد مریض بچوں کے والدین اخراجات سے بے نیاز ہو جائیں گے۔بچوں کی صحت پر کوئی سمجھوتہ نہیں،تمام وسائل مہیا کریں گے۔
