اسلام آباد(بیورو رپورٹ)بھاری بھرکم وفاقی کابینہ میں شامل ہونے والے نئے وزرا نے حلف اٹھا لیا،وزیر اعظم شہبازشریف کے مشیروں میں پرویز خٹک،محمد علی شاہ اور ڈاکٹرسید توقیرشاہ بھی شامل،وفاقی کابینہ کے نئے اراکین کے قلمدانوں کا اعلان بعد میں ہو گا۔
”پاکستان ٹائم“کے مطابق ایوان صدر میں نئے وفاقی وزرا کی حلف برداری کی تقریب ہوئی جہاں صدر مملکت آصف علی زرداری نے نئے وفاقی وزرا سے حلف لیا۔تقریب میں وزیر اعظم شہباز شریف اور دیگر وفاقی وزرا موجود تھے۔وفاقی کابینہ میں مزید 13 وزرا اور 11 وزرائے مملکت کی شمولیت ہوئی ہے،جس کے بعد وفاقی کابینہ کی مجموعی تعداد 31 ہو گئی ہے۔حلف اٹھانے والے وفاقی وزرا میں حنیف عباسی،ڈاکٹر طارق فضل چوہدری،معین وٹو،مصطفی کمال،سردار یوسف،علی پرویز ملک،شزہ فاطمہ،جنید انور،خالد مگسی،پیر عمران شاہ،اورنگزیب کھچی،رانا مبشر،رضا حیات ہراج شامل ہیں۔حلف اٹھانے والے وزرائے مملکت میں بیرسٹر عقیل ملک،ملک رشید،ارمغان سبحانی،طلال چوہدری، کھیئل داس،رحمان کانجو،بلال کیانی،مختار بھرت،شذرہ منصب،انور چوہدری،وجیہہ قمر شامل ہیں۔اس کے علاوہپرویز خٹک،توقیر شاہ اور محمد علی سمیت وزیر اعظم کے 3 مشیروں نے بھی عہدے کا حلف اٹھا لیا۔دوسری طرف نئے پارلیمانی سال کے آغاز پر صدرآصف زرداری نے پارلیمنٹ کا مشترکہ اجلاس دس مارچ کو طلب کرنے کا فیصلہ کر لیا، وزارت پارلیمانی امور نے مشترکہ اجلاس کی سمری وزیر اعظم کو بھجوا دی۔صدر مملکت آصف زرداری مشترکہ اجلاس سے خطاب کرینگے،صدر کے خطاب کے ساتھ ہی نئے پارلیمانی سال کا آغاز ہو جائے گا۔پارلیمنٹ کے مشترکہ اجلاس کے بعد گیارہ مارچ کو قومی اسمبلی کا اجلاس بھی طلب کرنے کا فیصلہ کیا گیا ہے۔
