نوشہرہ(بیورو رپورٹ)جمعیت علماءاسلام (جے یو آئی)ف کے سربراہ مولانا فضل الرحمان نے کہا ہے کہ دارالعلوم حقانیہ اور مولانا حامد الحق حقانی پر حملہ میرے گھر اور مدرسے پر حملہ ہے۔
”پاکستان ٹائم“کے مطابق مولانا فضل الرحمان نے مدینہ منورہ سے مرحوم کے بیٹے حافظ سلمان الحق سے رابطہ کیا اور تعزیت کرتے ہوئے واقعہ کی تفصیلات معلوم کیں۔فضل الرحمان نے مولانا حامد الحق کی شہادت پر گہرے غم کا اظہار کرتے ہوئے دارالعلوم حقانیہ پر دھماکے کی شدید مذمت کی اور کہا کہ مادر علمی دارالعلوم حقانیہ پر حملے اور برادرم مولانا حامد الحق سمیت شہداء اور زخمیوں کی خبر سے دل رنجیدہ اور زخمی ہے،دارلعلوم حقانیہ اور مولانا حامد الحق پر حملہ میرے گھر اور مدرسے پر حملہ ہے،ظالموں نے انسانیت،مسجد،مدرسے،جمعہ کے مبارک دن اور ماہ رمضان کی آمد کی حرمت کو پامال کیا،دہشت گردی اور بدامنی معاشرے کے لئے ناسور بن چکی ہے،قانون نافذ کرنے والے اداروں کی کارکردگی سوالیہ نشان ہے۔مولانا فضل الرحمان نے کہا کہ انسانیت کی جان،مال،عزت اور آبرو محفوظ نہیں،کے پی میں بدامنی بارے عرصے سے رونا رو رہے ہیں لیکن ریاست خاموش تماشائی بنی ہوئی ہے،مولانا عبدالحق کے خانوادے کی طرح میں خود کو بھی تعزیت کا مستحق سمجھتا ہوں،اللہ کریم مولانا حامد الحق اور دیگر کی شہادت قبول فرمائے، اللہ کریم زخمیوں کو جلد صحت دے،کارکن اس موقع پر بھر پور کردار ادا کریں۔
