اسلام آباد(بیورو رپورٹ)پاکستان تحریک انصاف(پی ٹی آئی)کے مرکزی رہنما اور قومی اسمبلی میں اپوزیشن لیڈر عمر ایوب خان نے صدر مملکت اور پیپلز پارٹی پر کڑی تنقید کرتے ہوئے کہا ہے کہ پیپلز پارٹی نے سندھ میں کرپشن کے ریکارڈ توڑ دیے ہیں،آصف زرداری ہو یا بلاول بھٹو دونوں سندھ کا پانی بیچنے جا رہے ہیں،صدر زرداری کے خطاب میں کوئی خاص بات نہیں تھی،شہبازشریف کی رجیم میں کیا خاص بات ہے جو یہ شہنائیاں بجا رہے ہیں؟
”پاکستان ٹائم“کے مطابق چیئرمین پی ٹی آئی بیرسٹر گوہرعلی خان اور دیگر رہنماوں کے ہمراہ میڈیا سینٹر میں پریس کانفرنس کرتے ہوئےاپوزیشن لیڈر عمر ایوب خان نے کہا کہ آصف زرداری خود کو صدر کہتے ہیں،ہم اس انسٹالڈ حکومت کو نہیں مانتے،آصف زرداری نے آج کوئی اچھی بات نہیں کی،پیپلز پارٹی نے سندھ میں کرپشن کے ریکارڈ توڑ دیے ہیں، آصف زرداری ہو یا بلاول بھٹو دونوں سندھ کا پانی بیچنے جا رہے ہیں،یہ پیکا ایکٹ میں فارم 47 کی حکومت کے ساتھ کھڑے رہے،پنجاب میں پکے کے ڈاکووں کے کا ایک گروہ ہے جس سرغنہ ڈاکٹر عثمان بنا ہوا ہے،موجودہ حکومت اقتصادی طور پر ناکام ہو چکی ہے۔
عمر ایوب خان نے کہا کہ کرپشن انتہا پر ہے اور یہ خوشیاں منا رہے ہیں کہ مہنگائی کم ہو گئی ہے،آئیں ہمارے ساتھ چلیں اور پتا کریں کہ مہنگائی کم ہوئی ہے یا بڑھی ہے؟دو سالوں میں ایس آئی ایف سی صفر بٹہ صفر رہی ہے،آج تک ہمارے سوالات کے جوابات نہیں دیے،آئی ٹی کا سیکٹر ختم کر دیا،کوئی انویسٹمنٹ نہیں آ رہی،بلوچستان کے مختلف اضلاع میں سکیورٹی کا کوئی انتظام نہیں،غفلت کی وجہ سے اس وقت ہمارے فوجی جان کا نظرانہ پیش کر رہے ہیں،عمران خان نے ہمیشہ کہا کہ فوج ہماری ہے،اس وقت بانی پی ٹی آئی اور بشریٰ بی بی کو بوگس کیسز میں گھسیٹا ہوا ہے،ہمارے رہنما اور ورکرز اس وقت سیاسی قیدی ہیں،ملک سے 20 لاکھ نوجوان ملک سے باہر چلے گئے ہیں ،ملک سے 27 ارب ڈالر باہر چلے گئے ہیں۔اس موقع پر بیرسٹر گوہر علی خان نے کہا کہ آج ہم نے بے نظیر کی تصویر کے پیچھے زرداری کی لیگیسی دیکھی،آج کی تقریر میں آصف زرداری ثابت نہیں کر سکے کہ ملک میں جمہوریت ہے،زرداری صاحب اپوزیشن کے چیمبر سے گزر کر نہیں گئے،آصف زرداری آج بھی متنازع صدر ہیں،صدر زرداری وفاق کی علامت نظر نہیں آئے،اس وجہ سے ہم نے احتجاج سے استقبال کیا،ہمارا احتجاج جیسے آج تھا،ہمیشہ ایسے جاری رہے گا،ہمیشہ فیصلے ایوان سے باہر ہوتے رہے ہیں،ایوان کو فوقیت نہیں دی گئی،ایوان مکمل نہیں ہے جس کا ہم اعادہ کر چکے ہیں۔پریس کانفرنس میں گفتگو کرتے ہوئے سینیٹ میں اپوزیشن لیڈر سینیٹر شبلی فراز نے کہا کہ اس ایوان میں جتنے بھی قوانین پاس ہوئے اس کی کوئی اخلاقی اور قانونی حیثیت نہیں ہے،سینیٹ میں ایک صوبے کی نمائندگی ہی نہیں ہے،ایک صوبے کی نمائندگی کے بغیر الیکشن کیسے کروا لیے جاتے ہیں اور بل پاس کیسے ہو رہے ہیں۔
