اسلام آباد(بیورو رپورٹ)پاکستان تحریک انصاف(پی ٹی آئی)اور جمعیت علمائے اسلام(جے یو آئی)کے درمیان اہم ملاقات کی اندرونی تفصیلات سامنے آگئی ہیں۔ذرائع کے مطابق پی ٹی آئی نے جے یو آئی کو عید کے بعد احتجاج میں شمولیت کی باضابطہ دعوت دے دی ہے جبکہ ذرائع کے مطابق مولانا نے تحریک انصاف کے احتجاج میں شامل ہونے کا مشروط عندیہ دے دیا ہے۔
”پاکستان ٹائم“کے مطابق ذرائع کا کہنا ہے کہ جے یو آئی نے پی ٹی آئی کا ساتھ دینے کے لیے مشروط حمایت کی یقین دہانی کرائی ہے۔جے یو آئی نے احتجاج میں شمولیت کے بدلے پی ٹی آئی سے مدارس بل پر حمایت کا مطالبہ کیا ہے،جے یو آئی کا موقف ہے کہ اگر پی ٹی آئی مدارس بل پر ان کا ساتھ دے تو وہ احتجاج میں پی ٹی آئی کی حمایت کے لیے تیار ہے تاہم پی ٹی آئی قیادت نے اس حوالے سے فوری جواب دینے کے بجائے بانی تحریک انصاف سے مشاورت کے لیے وقت مانگ لیا ہے۔ذرائع کے مطابق سلمان اکرم راجہ اڈیالہ جیل میں عمران خان سے ملاقات کریں گے اور اس معاملے پر حتمی مشاورت ہو گی۔پی ٹی آئی تحریکِ تحفظِ آئین کے ساتھ مل کر احتجاج کی تیاری مکمل کرے گی،جس کے بعد جے یو آئی کی شرکت کا حتمی فیصلہ متوقع ہے۔ذرائع کا کہنا ہے کہ مولانا فضل الرحمان ایک بار تحریک ا نصاف کے ساتھ مل کر حکومت کو”تگنی کا ناچ“نچانا چاہتے ہیں جبکہ اس کے بعد وہ حکومت سے”معاملات“طے کرنے کی اچھی پوزیشن میں آ جائیں گے۔
