اسلام آباد(بیورو رپورٹ)پٹرولیم مصنوعات بارے قیاس آرائیاں کی جا رہی تھیں کہ اس بار حکومت دس روپے سے زیادہ ریلیف دے گی تاہم پٹرولیم مصنوعات کی قیمتوں میں رد وبدل بارے اہم خبر آ گئی ہے۔
”پاکستان ٹائم“کے مطابق وزیر اعظم شہباز شریف نے پیٹرولیم مصنوعات کی قیمتیں موجودہ سطح پر برقرار رکھنے اور بجلی کے نرخوں میں نمایاں کمی کا عندیہ دیتے ہوئے کہا ہے کہ عوام کو بڑا ریلیف فراہم کرنے کے لیے حکومت ایک جامع پیکج تیار کر رہی ہے،جس کا اعلان آئندہ چند ہفتوں میں کیا جائے گا۔وزیرِ اعظم نے کہا کہ بجلی کے نرخوں میں کمی کے لیے حتمی تفصیلات مرتب کی جا رہی ہیں اور اس کا براہ راست فائدہ عوام کو پہنچے گا۔انہوں نے کہا کہ عالمی منڈی میں تیل کی قیمتوں میں اتار چڑھاو کے باوجود عوام کو زیادہ سے زیادہ ریلیف دینے کے لیے اقدامات کیے جا رہے ہیں،حکومت سنبھالتے ہی عوامی ریلیف کو اپنی اولین ترجیح بنایا اور اسی عزم کے تحت بجلی کی قیمتوں میں کمی کے اس منصوبے پر کام ہو رہا ہے،بجلی کی قیمت میں کمی کا اثر مجموعی طور پر مہنگائی پر بھی پڑے گا، جس سے عوام کو مزید سہولت حاصل ہوگی۔ وزیر اعظم نے اس عزم کا اظہار کیا کہ جلد ہی وہ خود قوم کو اس ریلیف پیکج کے حوالے سے آگاہ کریں گے تاکہ عوام کو درپیش معاشی مشکلات کو کم کیا جا سکے۔
