انت ناگ(مانیٹرنگ ڈیسک)پہلگام فالس فلیگ واقعہ پر پہلگام پولیس سٹیشن میں درج ایف آئی آر نے مودی حکومت کا جھوٹ بے نقاب کر دیا جبکہ دوسری طرف پہلگام حملے کو بھارتی حکومت کی سازش قرار دینے پر ریاست آسام کے رکن اسمبلی امین الاسلام کو گرفتار کر لیا گیا ہے۔
سیکیورٹی ذرائع کا کہنا ہے کہ پہلگام فالس فلیگ آپریشن کی ایف آئی آر نے حملے کو مشکوک بنا دیا،پہلگام پولیس سٹیشن واقعہ کی جگہ سے 6 کلو میٹر دوری پر ہے،ایف آئی آر کے مطابق پہلگام حملہ 13.50 سے14.20 تک جاری رہا۔حیران کن طور پر صرف دس منٹ میں 14.30 منٹ پر ایف آئی آر درج ہوجاتی ہے، 10 منٹ کے اندر ایف آئی آر درج ہونا پہلے سے طے منصوبے کا اشارہ دیتی ہے،ایف آئی آر میں طے شدہ منصوبے کے تحت نامعلوم سرحد پار دہشت گرد نامزد بھی ہو جاتے ہیں۔ایف آئی آر کے مطابق مبینہ دہشتگردوں کی طرف سے اندھا دھند فائرنگ کی گئی،بھارتی حکومت اور میڈیا واقعہ کو ٹارگیٹڈ کلنگ کا جھوٹا راگ الاپتے رہے،ایف آئی آر میں”بیرونی آقاوں کی ایماء پر“ جیسے الفاظ پہلے سے شامل کر دیے جاتے ہیں۔سیکیورٹی ذرائع کا کہنا ہے کہ ایف آئی آر نے مودی حکومت کا پہلگام فالس فلیگ کا بھانڈا پھوڑ دیا، ایف آئی آر میں جھوٹ بےنقاب ہونے پر مودی کا پہلگام فالس فلیگ ڈرامہ مذاق بن گیا ہے۔دوسری طرف پہلگام حملے کو بھارتی حکومت کی سازش قرار دینے پر ریاست آسام کے رکن اسمبلی امین الاسلام کو گرفتار کر لیا گیا ہے۔امین الاسلام آل انڈیا یونائیٹڈ ڈیموکریٹک فرنٹ کے رکن ہیں،انہوں نے فروری 2019 کے پلوامہ حملے اور پہلگام واقعے کو حکومت کی سازش قرار دیا،ان کا بیان سوشل میڈیا پر وائرل ہونے کے بعد پولیس نے انہیں گرفتار کیا۔وزیر اعلیٰ آسام ہیمنت بسوا سرما نے امین الاسلام کی گرفتاری کا حکم دیتے ہوئے کہا کہ پاکستان کی حمایت کرنے والوں کو بخشا نہیں جائے گا۔خیال رہے کہ مقبوضہ کشمیر کے علاقے پہلگام میں ہونے والے حملے میں 26 سیاح ہلاک ہوئے تھے،جس کے بعد بھارت نے پاکستان کے خلاف سخت اقدامات کا اعلان کرتے ہوئے واہگہ اٹاری سرحد بند کر دی تھی۔
علاوہ ازیں بھارت نے سندھ طاس معاہدہ یک طرفہ طور پر معطل کر دیا ہے جبکہ پاکستانیوں کے بھارتی ویزے منسوخ اور ہندوستان میں موجود پاکستانی شہریوں کو 48 گھنٹوں میں ملک چھوڑنے کا حکم بھی دیا۔
