مظفرآباد (وقائع نگار خصوصی)وزیراعظم آزاد کشمیر سردار تنویر الیاس خان کا مظفرآباد ڈویڑن کے مختلف علاقوں کا دورہ, علاقے کی تعمیر و ترقی اور جاری ترقیاتی منصوبوں کے حوالے سے سرکاری حکام کو اہم ہدایات جاری،میڈیا سے گفتگو میں اپوزیشن کو بھی پیغام دے دیا، 29ستمبر کو مظفر آباد جلسے کی تیاریوں اور عمران خان کے استقبال بارے پی ٹی آئی کے رہنماوں اور کارکنوں کو ٹاسک دے دیا۔
تفصیلات کے مطابق وزیراعظم آزاد کشمیر سردار تنویر الیاس خان نے’پاکستان ٹائم‘سے خصوصی گفتگو کرتے ہوئے کہا کہ مظفرآباد ڈویڑن میں تحریک انصاف کے لاکھوں ووٹرز موجود ہیں جو اپنے قائد عمران خان سے بے پناہ محبت رکھتے ہیں، چیئرمین تحریک انصاف عمران خان کا جلسہ آزاد کشمیر کی تاریخ کا سب سے بڑا جلسہ ہو گا،جلسے کی تیاریوں کے سلسلہ میں کارکنان اپنی تمام توانائیاں صرف کریں،جلسے میں خواتین کی بہت بڑی تعداد شریک ہو گی،اس سلسلہ میں پارٹی کی جانب سے پنڈال میں خصوصی انتظامات کئے جائیں۔
انہوں نے کہا کہ مظفرآباد ڈویڑن قدرتی نعمتوں سے مالا مال ہے،بدقسمتی سے ماضی میں اس ڈویڑن کے تعمیراتی کام تعطل کا شکار رہے ہیں تاہم اب تحریک انصاف کی حکومت آزاد کشمیر کی حکومت تمام اضلاع میں مساوی بنیادوں پر تعمیر و ترقی کے منصوبوں پر عملدرامد کر رہی ہے۔
وزیراعظم سردار تنویر الیاس خان نے عدم اعتماد کی بازگشت پہ گفتگو کرتے کہا کہ تحریک انصاف آزاد کشمیر کی حکومت عمران خان کے ویڑن کے مطابق اقتدار نچلی سطح پر منتقلی کے لئے دہائیوں بعد بلدیاتی انتخابات کا انعقاد کر رہی جسے اپوزیشن جماعتیں التوا کرنا چاہتی،تحریک انصاف کی حکومت کو کوئی خطرہ نہیں۔اپوزیشن کی کوئی چال کامیاب نہیں ہو گی،حکومت مخالف جماعتیں اپنا شوق پورا کر لیں،انہیں ناکامی کا منہ دیکھنا پڑے گا۔
وزیراعظم آزاد کشمیر سردار تنویر الیاس خان کا کہنا تھا کہ نوجوانوں کو روزگار فراہم کرنے کے لیے پرائیویٹ سیکٹر میں مواقع فراہم کیے جا رہے ہیں،نوجوان اس خطے کا مستقبل ہیں،اپنے نوجوانوں کے روشن مستقبل کے لئے کوئی کسر نہیں چھوڑیں گے۔وزیراعظم آزاد کشمیر سردار تنویر الیاس خان نے کہا کہ سیاحت،انفارمیشن ٹیکنالوجی اور انڈسٹریل زون میں ترجیحی بنیادوں پر اصلاحات کی جا رہی ہیں۔آئی ٹی زون کے قیام کے لئے بنیادی اقدامات کر لئے ہیں،اس سلسلہ میں پراﺅیٹ سیکٹر کو خصوصی مراعات دینے جا رہے ہیں،دیار غیر میں بیٹھے کشمیریوں سے بھی مکمل رابطے میں ہیں۔
