اسلام آباد(وقائع نگار خصوصی)وفاقی کابینہ کے اجلاس میں انکشاف ہوا ہے کہ سفارتی سائفر کی کاپی وزیراعظم ہاوس کے ریکارڈ میں موجود نہیں ہے،سائفر کی مبینہ چوری پرسابق وزیر اعظم، سابق پرنسپل سیکرٹری ٹو پرائم منسٹر، سینئر وزراءکے خلاف قانونی کارروائی پر غور۔
تفصیلات کے مطابق وزیراعظم شہباز شریف کی زیرِ صدارت وفاقی کابینہ کا اجلاس ہوا جس میں وفاقی حکومت نے سابقہ حکومت پر ڈپلومیٹک سائفرچوری کرنے کا الزام لگایا اور آڈیو لیکس معاملے پر اہم فیصلے کیے گئے۔اعلامیے کے مطابق آڈیو لیکس کی تحقیقات کے لیے کابینہ کی خصوصی کمیٹی تشکیل دے دی گئی ہے اور نیشنل سکیورٹی کمیٹی کی طرف سے آڈیو لیکس کی مکمل تحقیق کے فیصلے کی تائید کی گئی ہے۔اجلاس کے اعلامیے کے مطابق کابینہ کو بریفنگ میں بتایا گیا کہ متعلقہ ڈپلومیٹک سائیفر کی کاپی وزیراعظم ہاوس کے ریکارڈ سے غائب ہے، سابق وزیراعظم عمران خان کو بھجوائے جانے والے سفارتی سائفر کی وزیراعظم ہاوس میں وصولی کا ریکارڈ میں اندراج موجود ہے لیکن اس کی کاپی ریکارڈ میں موجود نہیں۔کابینہ نے فیصلہ کیا کہ قانون کے مطابق یہ کاپی وزیراعظم ہاوس کی ملکیت ہوتی ہے، ڈپلومیٹک سائفر کی ریکارڈ سے چوری سنگین معاملہ ہے، سائفر کی کاپی چوری ہونے کے معاملے پر کابینہ نے تفصیلی مشاورت کے بعد خصوصی کمیٹی تشکیل دے دی۔
اعلامیے میں بتایا گیا کہ کابینہ کمیٹی میں حکومت میں شامل اتحادی جماعتوں کے نمائندوں کے علاوہ خارجہ، داخلہ، قانون کی وزارتوں کے وزراءشامل ہوں گے جس میں کمیٹی تمام ملوث کرداروں بشمول سابق وزیر اعظم، سابق پرنسپل سیکرٹری ٹو پرائم منسٹر، سینئر وزراءکے خلاف قانونی کارروائی کا تعین کرے گی۔اس کے علاوہ کابینہ نے وزارت قانون کی سمری پر ریکوڈک پر ریفرنس سپریم کورٹ بھجوانے کی بھی منظوری دی ہے۔
علاوہ ازیں وفاقی کابینہ میں توانائی کی بچت کے منصوبہ پر بھی مشاورت ہوئی، وزیراعظم کو وزارت توانائی نے توانائی کی بچت کے لئے اقدامات پر بریفنگ دی گئی، شہبازشریف نے حکام کو توانائی کی بچت کے روڈ میپ کو حتمی شکل دینے اور اس پر مو¿ثر عمل درآمد کی ہدایت کردی۔خیال رہے کہ گزشتہ دنوں امریکی سائفر کے حوالے سے چیئرمین تحریک انصاف عمران خان کی سابق پرنسپل سیکرٹری اعظم خان کے ساتھ مبینہ آڈیو لیک ہوئی ہے جس میں وہ کہہ رہے ہیں کہ امریکا کا نام نہیں لینا، اب ہم نے صرف کھیلنا ہے۔آج دوسری آڈیو بھی لیک ہوئی ہے جس میں عمران خان کہتے ہیں کہ کسی کے منہ سے امریکا کا نام نہیں سننا چاہتا۔
