اسلام آباد (سٹاف رپورٹر )امپورٹڈ حکومت کیخلاف پاکستان تحریک انصاف کا فیصلہ کن لانگ مارچ،مرکزی قائدین کے اہم ترین مشاورتی اجلاس کا انعقاد،
چیئرمین تحریک انصاف عمران خان نے اجلاس کی صدارت کی،ملکی مجموعی سیاسی صورتحال،مجرموں کو ملنے والے این آر او اور تازہ ترین آڈیو لیکس سمیت اہم امور پر تفصیلی تبادلہ خیال کیا گیا۔اسلام آباد لانگ مارچ کی تیاریوں کے حوالے سے جامع حکمت عملی،امپورٹڈ حکومت کی جانب سے شرانگیزی اور تشدد کے امکانات پر بھی نہایت تفصیل سے غورکیا گیا ۔ تاریخ کے اعلان کے بعد بیک وقت کئی ایک حکمتِ عملی نکات کو حتمی شکل دینے کا فیصلہ،حتمی تاریخ کے اعلان سے قبل چیئرمین تحریک انصاف کا اسلام آباد اور گرد و نواح کے اضلاع کی تنظیموں کو بھرپور طریقے سے تیار کرنے کا فیصلہ،عمران خان پشاور ریجن اور فیصل آباد ڈویژنز میں بڑے ورکرز کنونشن سے خطاب کریں گے،
چیئرمین عمران خان کی جانب سے ذمہ داران کو اہداف سونپ دیے گئے۔ چیئرمین تحریک انصاف عمران خان نے اجلاس سے خطاب کرتے ہوئے کہا کہ اشرافیہ کیلئے اور عوام کیلئے دوسرے قانون کی روایت ملک کو تباہی کی دلدل میں دھکیل رہی ہے،قانون کی حکمرانی آگے بڑھنے کا واحد رستہ ہے،این آر اوز قانون کی حکمرانی کیلئے زہرِ قاتل،قوم پر مسلط بحرانوں کا حقیقی سبب ہیں،کرپٹ اور مجرم گروہ کیخلاف فیصلہ کن تحریک کا مرحلہ آن پہنچا ہے،بھرپور عوامی تائید و شرکت پاکستان کو غلامی و محکومی کے شکنجے سے آزاد کروانے کیلئے لازم ہے،بدترین مہنگائی،معاشی بربادی اور چوروں نے شکنجے سے نجات کیلئے عوام میدانِ عمل میں نکلنے کی تیاری کریں،ظالموں کو مزید مہلت نہیں دیں گے،جلد تاریخی لانگ مارچ کی تاریخ کا باضابطہ اعلان کروں گا۔
