ٹیکسلا(وقائع نگار خصوصی)سابق وزیراعظم اوور چیئرمین پاکستان تحریک انصاف عمران خان نے کہا ہے کہ اسحاق ڈار کو طاقتور لوگ پاکستان لائے ہیں،اسحاق ڈار ڈیل کے بغیر پاکستان نہیں آسکتا تھا،جن چوروں کو ہم پر مسلط کیا گیا،ہم نے ان سے جان چھڑانی ہے، امپورٹڈ حکومت نے تیسری دفعہ میرے گھر پولیس بھیجی ہے،امپورٹڈ حکومت سن لو، بجائے دھمکیاں دینے کے پکڑ کے جیل میں ڈال ہی دو،میں اور قوم تیار ہیں،پاکستان میں حقیقی تحریک کی آزادی چل پڑی ہے۔
تفصیلات کے مطابق ٹیکسلا میں منعقدہ جلسہ عام سے خطاب کرتے ہوئے سابق وزیراعظم عمران خان نے کہا کہ جب لوگوں کے ضمیروں کا سودا ہو رہا تھا تو غلام سرور خان میرے ساتھ کھڑے رہے،پاکستان کو ایسے سیاستدانوں کی ضرورت ہے جن کے ضمیر برائے فروخت نہیں ہوتے۔عمران خان نے کہا کہ ہم نے 28 مارچ کو ساری قوم کو ایک مراسلہ دکھایا جس میں سازش واضح تھی کہ امریکی انڈر سیکریٹری آف سٹیٹ نے پاکستانی سفارت کار کو حکم دیا کہ تحریک عدم اعتماد میں عمران خان کو ہٹایا جائے تو تمہیں معاف کر دیا جائے گا، قومی سلامتی کمیٹی میں مراسلہ لے کر گیا،اسمبلی میں بھجوایا،سپیکر نے چیف جسٹس کو بھیجا،اسی طرح صدر مملکت نے بھی چیف جسٹس کو مراسلہ بھیجا کہ انکوائری ہونی چاہیے،امپورٹڈ حکومت بار بار کہتی تھی کہ کوئی خط نہیں ہے،ان کے ساتھ میڈیا مل گیا،انہوں نے بھی کہا کہ مراسلہ نہیں ہے،سب سے بڑی ترجمان مریم نے کہاکہ یہ مراسلہ جھوٹ ہے،مریم کو درست رپورٹنگ کرنے پر شاباس دیتا ہوں،میں چیری بلاسم (شہباز شریف) اور مریم نواز آپ کا شکریہ ادا کرتا ہوں کہ انہوں نے سائفر کو اٹھا دیا،اب پوری قوم کے سامنے آ گیا کہ جو میں کہہ رہا تھا وہ سچ ہے،اب نیا ڈراما ہو رہا ہے کہ سائفر گم گیا ہے،مریم بی بی سائفر گم نہیں ہوا کیونکہ پتا چل جائے گا کہ آپ کے والد اور چاچا نے امریکیوں کے ساتھ مل کر سازش کرکے ہماری حکومت گرائی،اب دفتر خارجہ سے پوچھیں وہاں پر سائفر کی ماسٹر کاپی موجود ہے،میں اس قوم کو سڑکوں پر اس لیے نکالنے لگا ہوں کہ انہوں نے اپنی چوری بچانے کے لیے اس ملک کا اتنا بڑا نقصان کیا ہے،انہوں نے قانون میں جو تبدیلیاں کی ہیں،اس سے طاقت ور لوگ چوری کریں گے تو پکڑے نہیں جاسکیں گے،جو اس سازش کو کامیاب ہونے سے روک سکتے تھے،میرا سب سے سوال ہے کہ کیا آپ یہ سمجھتے ہیں کہ قوم آپ کو معاف کردے گی کہ آپ نیوٹرل ہیں؟قوم آپ کو معاف نہیں کرے گی،ملک تباہی کی طرف جارہا ہے،لوگوں کو مہنگائی کی دلدل میں پھنسا دیا،ان چوروں کو اوپر بیٹھا کر ان کے کیسز معاف ہو گئے اور ہم کہیں کہ جی میں تو نیوٹرل ہوں،قوم ان اداروں کی طرف دیکھتی ہے جو ان چوروں کو روک سکتے تھے۔
سابق وزیر اعظم عمران خان نے کہا کہ ہماری حکومت اس لیے ختم کی گئی کہ ملک میں مہنگائی بڑھ گئی تھی،بلاول بھٹو نے مہنگائی کے خلاف مارچ کیا تھا لیکن پاکستان میں اس وقت سب سے زیادہ مہنگائی ہے،پاکستان میں آٹے کی فی کلو قیمت 100 روپے سے زیادہ ہو گئی ہے،تحریک انصاف کی حکومت میں پیٹرول 150 روپے فی لیٹر تھا،بجلی کی فی یونٹ قیمت ٹیکس کے ساتھ 50 روپے تک پہنچ گئی ہے، پاکستان کا تنخواہ دار طبقہ مہنگائی کی وجہ سے پریشان ہے، پاکستان کی معیشت ہر روز نیچے جا رہی ہے، حکمرانوں نے کرپشن کے کیسز معاف کرائے اور مہنگائی میں اضافہ کیا۔
سابق وزیراعظم عمران خان نے سیاسی مخالفین کو سخت تنقید کا نشانہ بناتے ہوئے کہا کہ نواز شریف بزدل آدمی ہے جو ملک سے باہر بھاگ گیا،اسحاق ڈار نواز شریف سے بھی زیادہ بزدل آدمی ہے،اسحاق ڈار کو طاقتور لوگ پاکستان لائے ہیں،اسحاق ڈار کو یقین دلایا گیا کہ تمہیں کچھ نہیں ہوگا،اسحاق ڈار ڈیل کے بغیر پاکستان نہیں آسکتا تھا،ہمیں جیلوں سے خوف ہے نہ ہی نامعلوم ٹیلی فون دھمکیوں سے،ہر دوسرے روز ہمیں ڈرانے کی کوشش کی جاتی ہے،سب سن لو پاکستانی قوم نے خوف کا بت توڑ دیا ہے۔
عمران خان نے کہا کہ انہوں نے 1100 ارب روپے اس قوم کے معاف کروائے،اس پر میری قوم میرے ساتھ نہیں نکلے گی تو آپ کا کوئی مستقبل نہیں،مریم نواز کہتی ہے میرے داماد کی مشینری بھارت سے امپورٹ کریں،ہم نے بھارت سے کشمیر میں بھارتی اقدامات کی وجہ سے تجارت بند کی تھی،حقیقی آزادی کیلئے اسلام آباد کی طرف مارچ کا پلان بنا رہا ہوں،زنجیریں گرتی نہیں توڑنی پڑتی ہیں،ہم نے اپنے آپ کو آزاد کروانے کیلئے یہ سارے بت توڑنے ہیں،جن چوروں کو ہم پر مسلط کیا گیا ہم نے ان سے جان چھڑانی ہے،تیسری چیز ہم ملک میں قانون کی بالادستی کو یقینی بنائیں گے،ملک کی حقیقی آزادی کیلئے آپ سب نے میرا ساتھ دینا ہے۔
انہوں نے کہا کہ لندن کے سب سے مہنگے علاقے میں ان کی اربوں روپے کی پراپرٹیز ہیں،مریم نواز نے کہا تھا کہ لندن تو چھوڑو پاکستان میں بھی میری کوئی پراپرٹی نہیں ہے،پاکستان کے پیسوں سے بڑے بڑے محلات خرید کر کہتے ہیں ڈیل کرو،جب بھی ان کو خطرہ ہو گا یہ سب سے پہلے باہر بھاگیں گے،میں اب پوری تیاری کر رہا ہوں،ہمارا مقابلا مافیا،ڈاکووں اور مجرموں سے ہے، 25 مئی کو پولیس نے ہمارے لوگوں پر شیلنگ کی،کپتان تیاری کر رہا ہے،رانا ثنااللہ اور شہباز شریف تیار ہو جاو،مجھے آپ کے پلان کا پتہ ہے لیکن میرے پلان کا آپ کو نہیں پتہ،میں ا ن کی ساری پلاننگ کے مطابق تیاری کر رہا ہوں،آپ سب نے تیار رہنا ہے میں کبھی بھی کال دوں گا، پوری پلاننگ کر رہا ہوں آپ سب نے تیار رہنا ہے۔
