اسلام آباد(وقائع نگار خصوصی)آزاد جموں و کشمیر کے وزیر اعظم سردار تنویر الیاس خان نے کہا ہے کہ عمران خان نے تاریخی فتح حاصل کرکے خودداری،غیرت اور حمیت کے علم کو بلند کر دیا ہے،عمران خان نے کرپٹ مافیا کو شکست دے کر یہ ثابت کر دیا کہ وہ اس قوم کے متفقہ لیڈر ہیں،عمران خان کا پیغام اب پوری قوم میں سرایت کر چکا،قوم ان کی ایک کال کا انتظار کر رہی ہے،عمران خان جب بھی انہیں پکاریں گے وہ ان کی آواز پر لبیک کہیں گے،وہ جب بھی کال دیں گے کشمیری عوام بھی ان کی کال پر لبیک کہے گے۔
وزیراعظم سردار تنویر الیاس خان نے اپنے خصوصی بیان میں کہا کہ ضمنی انتخابات میں متحدہ اپوزیشن کی شکست فاش نے کرپٹ مافیا کی چیخیں نکال دی ہیں،عوام عمران خان کے پیغام کو سمجھ چکی اور اس میں شعور بیدار ہوچکا ہے۔انہوں نے کہا کہ ملک اس وقت وقت جس صورتحال کا شکار ہے اس کا تقاضا ہے کہ فوری طور پر عام انتخابات کا اعلان کر دیا جائے،عمران خان کو ایک سازش کے ذریعے اقتدار سے بے دخل کیا گیا،قوم اس سازش کو جان چکی ہے،عوام عمران خان کے ساتھ ہے،ضمنی انتخابات میں عمران خان کی واضح برتری عوامی ریفرنڈم ہے،جسے سمجھنے کی کوشش کی جانی چاہیے،عمران خان نے اپنے دور اقتدار میں اس ملک کو حقیقی معنوں میں میں ایک ایسی حکومت دی جو عوام کے دکھوں کا مداوا کر رہی تھی،طب کے میدان میں صحت کارڈ اتنا بڑا تحفہ ہے جس سے اس ملک کے کروڑوں عوام کو فائدہ پہنچا،جو پیسے خرچ نہیں کر سکتے تھے انہیں علاج معالجے کی بہترین سہولتیں فراہم کی ہیں ،اس کے علاوہ ایسے کئی عوام دوست اقدامات تھے جو عمران خان نے کیے اور جن سے اس قوم کو بہت فائدہ ہوا،حالات اس بات کے متقاضی ہیں کہ عام انتخابات کا اعلان کیا جائے جس کا عمران خان مطالبہ کر رہے ہیں اور اس کرپٹ مافیا کو گھر کی راہ دکھائی جائے۔
