ریاض (خصوصی نمائندہ)سعودی ولی عہد محمد بن سلمان نے سعودی عرب میں قید پاکستانیوں کے لیے بڑا فیصلہ کرتے ہوئے مسجد نبوی میں ہنگامہ آرائی کرنے والے تمام پاکستانیوں کی رہائی کا حکم دے دیا،سعودی عرب کے ولی عہد کے اس فیصلے پروزیراعظم شہباز شریف نے محمد بن سلمان کا تہہ دل سے شکریہ ادا کیا ہے۔
تفصیلات کے مطابق وزیراعظم شہباز شریف نے سعودی ولی عہد سے افسوسناک واقعہ پر گرفتار پاکستانیوں کی رہائی کی درخواست کی تھی۔وزیراعظم شہباز شریف نے شہزادہ محمد بن سلمان سے درگزر سے کام لینے کی درخواست کی تھی۔شہزادہ محمد بن سلمان کی طرف سے قیدیوں کی رہائی کے حکم کے بعد وزیراعظم نے اظہار تشکر کرتے ہوئے کہا کہ اللّٰہ تعالیٰ آپ کو اس کا اجر عطا فرمائے۔خیال رہے کہ خواجہ لقمان، محمد افضل، غلام محمد کو 8 سال قید کی سزا سنائی گئی تھی، انس، ارشد اور محمد سلیم کو 6 سال قید کی سزا سنائی گئی تھی۔ایک اور پاکستانی طاہر ملک کو 3 سال قید اور 10 ہزار ریال جرمانہ کیا گیا تھا۔واضح رہے کہ مسجد نبوی میں ہنگامہ آرائی کرنے پر مدینہ منورہ کی عدالت نے تین پاکستانیوں کو 8 سال اور تین کو 6 سال قید کی سزا سنائی تھی۔
