ایڈیلیڈ(سپورٹس رپورٹر) ٹی 20 ورلڈکپ کے دوسرے سیمی فائنل میں انگلینڈ نے بھارت کو تگنی کا ناچ نچاتے ہوئے انگلش بلے بازوں نے بھارتی باولرز کی درگت بنا ڈالی ،انگلش اوپنرزکپتان جوز بٹلر اور ایلکس ہیلز نے بھارتی سورماوں کی ایک نہ چلنے دی اور ورلڈ کپ کے فائنل میں کوالیفائی کر لیا،انگلش بلے بازوں نے دوسرے سیمی فائنل میں بھارت کی جانب سے دیئے گئے 169 رنز کے پہاڑ جیسے ہدف کو کسی وکٹ کے نقصان کے بغیر با آسانی حاصل کر لیا۔انگلینڈ کی ٹیم اتوار کے روز پاکستانی شاہینوں سے فائنل کھیلنے کے لئے میدان میں اترے گی۔
تفصیلات کے مطابق ٹی 20 ورلڈ کپ کے دوسرے سیمی فائنل میں انگلینڈ نے بھارت کی جانب سے دیئے گئے 169 رنز کے ہدف کو حاصل کرتے ہوئے بھارت کو 10 وکٹوں سے شکست دے دی،انگلینڈ کے اوپنرز نے ناقابل شکست اننگز کھیلتے ہوئے 16 ویں اوور میں 169 رنز کا ہدف حاصل کر لیا۔ایلکس ہیلز اور جوز بٹلر نے بہترین پارٹرشپ کے ساتھ ففٹی بنائی۔دونوں اوپنرز نے ناقابل شکست اننگز کھیلی اور انگلینڈ نے بغیر کسی نقصان کے ہدف کو آسانی سے حاصل کر لیا۔کپتان جوز بٹلر نے 49 گیندوں پر 80 رنز بنائے اور ایلکس ہیلز نے 47 گیندوں پر 86 رنز بنائے۔ دونوں کھلاڑی ناٹ آوٹ رہے اور بھارت کا فائنل میں پہنچنے کا خواب کرچی کرچی کر دیا۔انگلینڈ کی جیت کے بعد اب میلبرن کے میدان میں پاکستان اور انگلینڈ کے درمیان فائنل میچ کھیلا جائے گا۔
اس سے قبل انگلینڈکے کپتان جوز بٹلر نے ٹاس جیت کر پہلے فیلڈنگ کرنے کا فیصلہ کیا۔بھارت نے پہلے بیٹنگ کرتے ہوئے مقررہ اوورز میں 6 کھلاڑیوں کے نقصان پر 168 رنز بنائے۔انگلینڈ کے خلاف بھارت کی بیٹنگ کا اچھا آغاز نہ ہوا اور 9 رنز پر ہی بھارت کی پہلی وکٹ گر گئی۔ بھارتی اوپنر ایل راہول صرف 5 رنز بنا کر کرس ووکس کی گیند پر آوٹ ہو گئے۔بھارت کے 56 کے مجموعی سکور پر دوسری وکٹ بھی گر گئی اور بھارتی بلے باز روہت شرما 28 گیندوں پر 27 رنز بنا کر جارڈن کی گیند پر کیچ آوٹ ہوئے۔ بھارت کا تیسرا کھلاڑی سوریہ کمار یادیو 75 کے مجموعی رنز پر ہی پویلین لوٹ گئے انہوں نے ایک چوکے اور ایک چھکے کی مدد سے 10 گیندوں پر 14 رنز بنائے۔ویرات کوہلی نے بہترین کھیل پیش کرتے ہوئے ففٹی بنائی اور اگلے گیند پر ہی آوٹ ہو گئے۔ ہاردک پانڈیا نے جارحانہ اننگز کھیلی انہوں نے 4 چھکے اور 2 چوکوں کی مدد سے اپنی ففٹی مکمل کی۔ وہ 33 گیندوں پر 63 رنز بنا کر اننگز کی آخری گیند پر آوٹ ہوگئے۔بھارتی کھلاڑی رشبھ پنت 158 کے مجموعی رنز پر آوٹ ہو گئے انہوں نے صرف 6 رنز بنائے۔انگلینڈ کے باولر کرس جارڈن نے 4 وکٹیں حاصل کیں جبکہ عادل رشید اور کرس ووکس نے ایک ایک کھلاڑی کو آوٹ کیا۔انگلینڈ کے سکواڈ میں کپتان جوز بٹلر،ایلکس ہیلز،فل سالٹ، بین اسٹوکس،ہیری بروک،لیام لیونگ سٹون،معین علی،سیم کرن،کرس جارڈن،کرس ووکس اور عادل رشید شامل تھے جبکہ بھارتی سکواڈ میں کپتان روہت شرما، کے ایل راہول،ویرات کوہلی،سوریہ کمار یادو،رشبھ پنت،ہاردک پانڈیا،اکشر پٹیل، آر اشون، محمد شامی، بھونیشور کمار اور ارشدیپ سنگھ میدان میں اترے۔
