لاہور(وقائع نگار خصوصی)پنجاب اسمبلی کو تحلیل کئے جانے کے معاملے پر پاکستان تحریک انصاف (پی ٹی آئی) کے چیئرمین عمران خان کی وزیرِ اعلیٰ پنجاب چوہدری پرویز الہٰی سے اہم ملاقات ہوئی،جس میں وزیر اعلیٰ پنجاب نے اسمبلیوں سے استعفے دینے کے فیصلے کی مکمل حمایت کا اعلان کر تے ہوئے کہا کہ وہ ہر طرح سے تیار ہیں، عمران خان کے ساتھ کھڑے ہیں اور کھڑے رہیں گے،عمران خان جب انہیں حکم دیں گے تو وہ اسمبلی تحلیل کر دیں گے،پی ڈی ایم نااہلوں کا ٹولہ ہے،اپوزیشن کا ہر ہتھکنڈے کو ناکام بنائیں گے، 13 جماعتوں کے پاس نا تو عددی اکثریت ہے اور نا ہی ان کے اندر اتنا حوصلہ ہے کہ وہ تحریک عدم اعتماد پیش کریں۔
تفصیلات کے مطابق زمان پارک لاہور میں زیراعلی پنجاب چوہدری پرویز الٰہی اور پی ٹی آئی کے چئیرمین عمران خان کی ملاقات میں ق لیگ کے سینئر رہنما مونس الٰہی ،چوہدری حسین الٰہی بھی شریک تھے جبکہ پی ٹی آئی کے مرکزی رہنما پرویز خٹک بھی ملاقات میں شریک تھے،اس اہم ملاقات میں پنجاب اسمبلی کے رولز آف پروسیجر کا تفصیلی جائزہ لیا گیا، اسمبلی کے قواعد و ضوابط اور ٹیکنیکل پہلووں پر بھی غور کیا گیا۔پرویز الٰہی اور عمران خان نے اپوزیشن کے ہرغیرآئینی ہتھکنڈے کا ڈٹ کر مقابلہ کرنے کا عزم کیا۔ملاقات میں چوہدری پرویز الٰہی نے اسمبلی تحلیل کرنے سے متعلق تجاویز عمران خان کے سامنے رکھیں۔پرویز الٰہی کا کہنا تھا کہ استعفے دینے کا فیصلہ عمران خان کا ہے، ہم اس فیصلے کی مکمل حمایت کرتے ہیں، اسمبلیاں تحلیل یا مستعفی ہونے پر ملک عام انتخابات کی طرف جانا چاہئے، اسمبلی تحلیل کرنے سے قبل آئینی آپشنز اور پی ڈی ایم کی متوقع حکمت عملی پر بات چیت ہوگی۔
وزیراعلیٰ پنجاب نے مزید کہا کہ پی ڈی ایم کے پاس تحریک لانے کیلئے مطلوبہ اکثریت موجود نہیں، پی ڈی ایم صرف شور شرابا کر رہی ہے، انہیں ایوان میں شکست فاش دیں گے،اسمبلی تحلیل کرنے میں رتی برابر بھی تاخیر نہیں ہوگی، اسمبلی عمران خان کی امانت ہے، امانت انہیں دیدی ہے، عمران خان کے ہر فیصلے کا ساتھ دیں گے۔پرویزالٰہی نے کہا کہ ہم جس کے ساتھ چلتے ہیں، اس کا پورا ساتھ دیتے ہیں،غلط فہمیاں پیدا کرنے والے پھر ناکام ہوں گے،اپوزیشن عدم اعتماد لانے کا شوق پورا کرلے، اسے پہلے کی طرح پھر ناکامی ہوگی، اپوزیشن کو پہلے بھی مار پڑی، آئندہ بھی پڑے گی، اسمبلی اجلاس ہورہا ہو تو گورنر راج نہیں لگ سکتا، اپوزیشن اسمبلی کے رولز آف بزنس کا مطالعہ کرلیا کرے۔پرویزالٰہی کے ساتھ ساتھ مونس الٰہی نے بھی عمران خان کو اپنی حمایت کی یقین دہانی کرادی۔اس موقع پر عمران خان کا کہنا تھا کہ پنجاب کی پارلیمانی پارٹی کا اجلاس کل طلب کیا ہے، جس میں پنجاب اسمبلی کے مستقبل سے متعلق مشاورت ہوگی۔عمران خان نے کہا کہ چوروں کے ٹولے نے معیشت تباہ کردی ہے۔
