لاہور(سٹاف رپورٹر)پنجاب میں موسم سرد جبکہ سیاسی موسم خوب’گرم‘ہو چکا ہے،تحریک انصاف کے رہنماوں نے پاکستان مسلم لیگ ن اور پیپلز پارٹی کی قیادت پر لفظی گولہ باری کی بوچھاڑ کی ہوئی ہے،عمر سرفراز چیمہ،میاں اسلم اقبال اور مسرت جمشید چیمہ پیپلز پارٹی اور ن لیگ پر تنقید کا کوئی موقع ہاتھ سے جانے نہیں دے رہے۔
”پاکستان ٹائم “کے مطابق سابق گورنر اور مشیر داخلہ و اطلاعات پنجاب عمر سرفراز چیمہ نے کہا ہے کہ شریف زرداری گینگ معاشی دہشت گردوں کا گروہ ہے،انہوں نے اپنی اربوں کی چوری معاف کروا کر دوسروں کے لئے بھی کرپشن کا راستہ کھول دیا ہے۔عمر سرفرازچیمہ نے کہا کہ شریف زرداری گینگ نے آئین و قانون کی دھجیاں اڑاتے ہوئے اداروں کی ساکھ کو تباہ کیا ہے،شریف زرداری گینگ ایک بار پھر پنجاب میں جمہوریت پر شب خون مارنے کے لئے سرگرم ہے،یہ گینگ با اثر طاقتور ڈاکووں کا یک نکاتی اتحاد ہے۔
ترجمان پنجاب حکومت مسرت جمشید چیمہ نے کہا کہ ہر دن کا آغاز معاشی میدان میں ایک بری خبر سے ہوتا ہے، ٹیکسٹائل انڈسٹری سے لاکھوں خاندان وابستہ ہیں اور یہ صنعت تباہی کے دہانے پر ہے،اس وقت جن گھروں میں بھوک کا راج وہ لوگ ان سازشیوں کو جھولی بھر کے بد دعائیں دے رہے ہیں،اگر حکومت ملک کی کوئی خدمت کرنا چاہتی ہے تو فوری الیکشن کا اعلان کرے،فوری اور شفاف انتخابات کا انعقاد ہی ملک کو بہتری کی جانب لے جائے گا۔انہوں نے کہا کہ ن لیگ والے ہر بار اپنے اقتدار کے دوران کرپشن کیسز سے دھل کر باہر نکل آتے ہیں،افسوس اقتدار کی جنگ میں امپورٹڈ حکومت اندھی ہو چکی ہے،دنیا آگے کی طرف بڑھ رہی ہے اور ہم پیچھے سے پیچھے کا سفر جاری رکھے ہوئے ہیں،آج ملک کا بچہ بچہ جانتا ہے کہ کس کس نے پاکستان کو کتنا نقصان پہنچایا ہے۔مسرت جمشید چیمہ کا کہنا تھا کہ جس خدشے کا اظہار ہم مسلسل کر رہے تھے اب وہ حقیقت کا روپ دھار چکا ہے،ہمارے زرمبادلہ کے ذخائر اتنے کم ہو چکے ہیں کہ اب سرجری کے ساز و سامان بھی امپورٹ نہیں کیے جا سکتے،عالمی مالیاتی ادارہ ( آئی ایم ایف) اس نااہل ٹولے سے مذاکرات نہیں کر رہا،پاکستان ایک دلدل میں پھنس چکا ہے جس کے ذمہ دار تمام سازشی ہیں۔
سینئر صوبائی وزیر میاں اسلم اقبال نے کہا ہے کہ شریف اور زرداری خاندانوں کی کرپشن نے ملک کو دنیا میں رسوا کیا، شریف اور زرداری خاندان نے قومی خزانے سے اپنی تجوریاں بھریں اور ملک کو کنگال کیا،آئی ایم ایف وفاق میں بیٹھے کرپٹ ٹولے پر اعتبار کرنے کو تیار نہیں،آئی ایم ایف پی ڈی ایم کی کرپشن کی کہانیاں جانتاہے،پی ڈی ایم حکومت غریب کو ریلیف دینے کے لئے کوئی ترمیم نہ کرسکی، اپنی کرپشن چھپانے کے لئے نیب قوانین بدل دیئے گئے، 8ماہ قبل جمہوری حکومت کو غیر ملکی ایجنڈے کے تحت گھر بھیج دیا گیا،پنجاب کی تاریخ کی پہلی اپوزیشن ہے جو الیکشن نہیں چاہتی،رات کے اندھیرے میں جمہوریت پر شب خون مارنے والے عوام کا سامنا کرنے سے خوفزدہ ہیں۔
