راولپنڈی(وقائع نگار خصوصی)پاک فوج کی کمانڈ میں تبدیلی کے بعد اعلیٰ فوجی افسران کی توجہ ادارے کی ساکھ بہتر بنانے اور دہشت گردی سے نمٹنے پر مرکوز ہو گئی ہے۔ اس سلسلے میں پاک فوج کے شعبہ تعلقات عامہ یعنی آئی ایس پی آر کی تنظیم نو کی تیاری کی جارہی ہے۔
”پاکستان ٹائم“ کی رپورٹ کے مطابق قابل اعتبار ذرائع نے نام ظاہر نہ کرنے کی شرط پر بتایا کہ 19 نومبر کو کمانڈ کی تبدیلی کے بعد پوری توجہ ساکھ کی بہتری اور ملک میں بڑھتے دہشت گردی کے واقعات پر ہے،اطلاعات ہیں کہ فوجی قیادت نے ادارے کی ساکھ بہتر بنانے کیلئے متعلقہ حلقوں سے تجاویز مانگ لی ہیں اور موجودہ پالیسی پر نظرثانی اور آئی ایس پی آر کے لیے ایک نئی پالیسی بنانے کیلئے ہدایات جاری کی جا چکی ہیں،اس سلسلہ میں پاک فوج کے شعبہ تعلقات عامہ میں تبدیلیاں لائی جا سکتی ہیں اور اس کی تنظیم نو کی جا سکتی ہے تاکہ وہ رئیل ٹائم معلومات کی بنیاد پر نتائج دے۔
دہشت گردی کے واقعات میں اضافہ ایک سنگین معاملہ ہے اور اس حوالے سے نئے آرمی چیف جنرل عاصم منیر نے خیبرپختونخوا کے حساس علاقوں کے متعدد دورے کیے ہیں لیکن ان دوروں کو ذرائع ابلاغ میں زیادہ توجہ نہیں ملی جس کا سبب یہ تھا کہ آئی ایس پی آر نے صحافیوں اور دیگر پروفیشنلز سے درخواست کی تھی کہ وہ دفاعی معاملات پر غیر ضروری بحث سے گریز کریں۔اس سے ادارے کی میڈیا منیجمنٹ میں تبدیلی کا اشارہ ملتا ہے۔ماضی کے برعکس اس مرتبہ آرمی چیف کی زیر سربراہ کور کمانڈرز کی ایک حالیہ میٹنگ کے بعد پریس ریلیز جاری نہیں کی گئی،اسی وجہ سے اجلاس میں ہونے والے فیصلوں پر ذرائع ابلاغ میں زیربحث نہیں آئے۔
یاد رہے کہ چیف آف آرمی سٹاف جنرل عاصم منیر نے کمان سنبھالنے کے دو ہی دن بعد ہی پہلی بڑی تبدیلی کی تھی جہاں آئی ایس پی آرکی قیادت کے لیے حیران کن طور پر الیکٹریکل اینڈ مکینیکل انجینئرنگ کور سے انتخاب کرتے ہوئے میجر جنرل احمد شریف کو لیفٹیننٹ جنرل بابر افتخار کی جگہ پاک فوج کے شعبہ تعلقات عامہ کا سربراہ مقرر کیا گیا تھا۔میجر جنرل احمد شریف اس سے قبل ڈیفنس سائنس اینڈ ٹیکنالوجی آرگنائزیشن کے سربراہ تھے جو سائنسی اور تکنیکی تحقیق اور ایرو ڈائنامکس، پروپلشن اور پروپیلنٹ اور ایویونکس کے شعبوں میں ہتھیاروں کے نظام کے فروغ میں مصروف ایک خفیہ تنظیم ہے،وہ ملٹری آپریشنز ڈائریکٹوریٹ میں بھی خدمات انجام دے چکے ہیں۔آئی ایس پی آر کے سربراہ کے طور پر انجینئر کی تقرری غیر معمولی نہیں البتہ میجر جنرل شریف ای ایم ای کور کے پہلے افسر ہیں جنہوں نے یہ عہدہ سنبھالا ہے۔
