اسلام آباد(وقائع نگار خصوصی)پاکستان تحریک انصاف کے رہنما اور سابق وزیر خارجہ شاہ محمود قریشی نے کہا ہے کہ بلاول بھٹو زرداری کا اختیار نہیں کہ اسمبلی میں واپس آنے کی دعوت دیں،یہ وزیر اعظم کا استحقاق ہے۔
’پاکستان ٹائم‘کے مطابق پی ٹی آئی کے وائس چیئرمین شاہ محمود قریشی نے بلاول بھٹو زرداری کی آفر ٹھکراتے ہوئے کہا ہے کہ بلاول بھٹو زرداری کا اختیار نہیں کہ اسمبلی میں واپس آنے کی دعوت دیں،یہ دعوت وزیراعظم دے سکتے ہیں، حکومت انتخابات کی تاریخ دے تو بات کرنے کیلئے تیار ہیں،الیکشن اصلاحات کیلئے بیٹھ کر تعاون بھی کریں گے،وہاں سے مختلف سگنلز آرہے ہیں،کچھ دعوت دیتے ہیں کچھ دعوت سے کتراتے ہیں۔
واضح رہے کہ بلاول بھٹو نے تحریک انصاف کو پارلیمنٹ میں واپسی کی دعوت دیتے ہوئے کہا تھا کہ عمران خان خود کو جمہوری کہتے ہیں تو واپس پارلیمان میں آئیں،اپنا کام کریں،ہم نے چار سال آپ کو بھگتا،آپ نے پہلے دن ہی نخرے شروع کر دیے،پارلیمنٹ واپس آو اپنا اپوزیشن کا کام کرو پھر سیاسی جماعتیں آپ سے بات کریں گی،الیکشن اور نیب ریفارمز کیلئے اپنا حصہ ڈالو،سڑکوں پر کالعدم تنظیموں کے ساتھ گھومو گے تو مذاکرات نہیں ہوں گے،عوام کو موقع ملے گا،وہ آپ کو بھی پہچانتے ہیں اور ہمیں بھی۔
