کراچی(وقائع نگار خصوصی)پاکستان پیپلزپارٹی کے چیئرمین اور وزیر دفاع بلاول بھٹو زرداری نے دعویٰ کرتے ہوئے کہا ہے کہ کراچی کے بلدیاتی انتخابات 15 جنوری کو ہوں گے اور نیا ناظم پیپلز پارٹی سے ہوگا،عمران خان کی سیاست نے جمہوریت اورسیاست کونقصان پہنچایا، 6 مہینے گزر گئے لیکن اب تک بنی گالہ سے چیخیں آرہی ہیں،مراد علی شاہ صرف کراچی نہیں پورے سندھ کے وزیراعلیٰ ہیں،وہ ہر علاقے کی اونر شپ لیتے ہیں،مراد علی شاہ پورے صوبے کی خدمت کررہے ہیں،کراچی کے بلدیاتی انتخابات 15 جنوری کو ہوں گے اور نیا ناظم پیپلز پارٹی سے ہو گا۔
کراچی میں جلسے سے خطاب کرتے ہوئے بلاول بھٹو زرداری کا کہنا تھا کہ میں نے فیصلہ کیا تھا کہ نئے سال کا جشن کراچی والوں کے ساتھ منانا ہے،امید ہے کہ یہ شہر رات12 بجے باہر نکلے گا اور نئے سال کا استقبال کرے گا،پچھلے سال پاکستان پیپلز پارٹی کے کارکنوں نے اسلام آباد تک لانگ مارچ کیا،یہ کارکنوں کی فتح ہے کہ انہوں نے کٹھ پتلی حکومت کو جمہوری طریقے سے نکالا،ایک سال میں پیپلزپارٹی نے وہ کام کر کے دکھایا جو وعدہ کیا تھا،عدم اعتماد سے ایک شخص کو گھر بھیجا گیا،یہ عوام کی جیت ہے،آپ نے ہی اس سلیکٹڈ، کٹھ پتلی اور نالائق کا بندوبست کیا، 6 مہینے گزرنے کے بعد بھی بنی گالہ سے چیخوں کی آوازیں آرہی ہیں،عمران خان کی سیاست نے جمہوریت اورسیاست کونقصان پہنچایا، پیپلزپارٹی نے ماضی میں بھی ملک کوبچایا،مستقبل میں بھی بچائیں گے،جب بھی مقابلہ ہوگا،جیت سچ کی اور شکست جھوٹ کی ہوگی۔
بلاول بھٹو زرداری کا کہنا تھا کہ یہ کہتے ہیں کہ کراچی کسی ایک جماعت اور زبان بولنے والوں کا ہے لیکن پیپلزپارٹی کہتی ہے یہ شہر ہرزبان بولنے والوں کا ہے،مراد علی شاہ نے کراچی کے لیے جتنا کام کیا،کوئی وزیراعلیٰ ان کا مقابلہ نہیں کرسکتا،ہمارا وزیراعلیٰ پورے سندھ کا وزیراعلیٰ ہے،کراچی کاوزیراعلیٰ ہے،گنیز بک آف ورلڈ ریکارڈ قائم ہوا ہو گا کہ کتنی بار کراچی کے بلدیاتی الیکشن ہوتے ہوتے رہ گئے،یہ کہتے ہیں ہم الیکشن سے بھاگ رہے ہیں،اصل میں یہ بھاگ رہے ہیں،کراچی کے بلدیاتی انتخابات 15 جنوری کو ہوں گے اور نیا ناظم پیپلز پارٹی سے ہوگا۔
انہوں نے کہا کہ استعفے دینے والوں کے استعفے منظور نہیں ہو رہے،ان کا لیاری کا رکن کہتا ہے اسمبلی نہیں چھوڑنی، تو ایک طرف عمران خان کہتا ہے استعفے منظور کرو،دوسری طرف ان کے درجنوں اراکین کہتے ہیں ہمارے استعفے منظور نہ کریں،اس وقت ملک کی معیشت بحران میں ہے،ان سارے مسائل سے نکلنے کے لیے روٹی،کپڑا اور مکان کا نعرہ ہے،پیپلز پارٹی نے ماضی میں ملک کو بچایا تھا،مستقبل میں بھی پاکستان پیپلز پارٹی ملک کو بچائے گی،ہم سلیکٹڈ کے خلاف جدوجہد کیلئے نکلے،ہم نے سلیکٹڈ اور کٹھ پتلی کو گھر بھیجا،ہم تقسیم،نفرت اور جھوٹ کی سیاست کے خلاف نکلے،عمران خان نے سیاست اور معیشت کو نقصان پہنچایا،مسائل سے نکلنے کا واحد نظریہ بینظیر بھٹو کا منشور ہے۔
