اسلام آباد(وقائع نگار خصوصی)وزیراعظم شہباز شریف نے عمران خان پر تنقید کرتے ہوئے در پردہ پاک فوک کے سابق سربراہ جنرل (ر)قمر جاوید باجوہ کے خلاف بھی اپنے دل کی بھڑاس نکال دی ،انہوں نے کہا کہ جنرل باجوہ نے عمران خان کیلئے فوج کی ساری صلاحیتیں جھونک دیں، عمران خان کو الزام لگانے کے سوا کوئی کام نہیں آتا، گالم گلوچ میں عمران خان کا کوئی مقابلہ نہیں، عمران خان کو 4 سال تک مکمل سپورٹ ملی، آج وہ جنرل باجوہ پر تنقید کرتے ہیں، عمران نیازی کی کرتوتیں ثابت کرتی ہیں کہ اس سے بڑا محسن کش پیدا نہیں ہوا۔
ہزارہ الیکٹرک سپلائی کمپنی کے قیام کی تقریب سے خطاب کرتے ہوئے وزیراعظم شہباز شریف نے کہا کہ ہزارہ الیکٹرک سپلائی کمپنی کے قیام پرخوشی ہے، عوامی منصوبوں اور فلاح کے کاموں کے لئے ہر ممکن اقدامات کیے جائیں گے، ہزارہ الیکٹرک سپلائی منصوبہ عوام کو سہولت فراہم کرے گا، کمپنی کے ضروری اقدامات فی الفور پورے کریں گے، سوئی گیس کے منصوبوں کی جلداز جلد تکمیل کے لئے احکامات جاری کردیے ہیں، الیکٹرک سپلائی کا منصوبہ ہزارہ کی عوام کوسہولت دے گا ،امیر مقام نے ہمیشہ عوامی مسائل کے حل اور فلاحی کاموں کی بات کی ہے،امیر مقام کی جانب سے تمام گزارشات کو سن چکے ہیں، عوامی منصوبوں اور فلاح کے کاموں کے لیے ہر ممکن اقدامات کیے جائیں گے اور ہزارہ سمیت ملک بھر میں گیس کے منصوبے کو مکمل کرنے کی ہدایات دی ہیں،ہزارہ الیکٹرک سپلائی کمپنی کے ضروری اقدامات فوری طور پر مکمل کریں گے۔ مئی میں جلسے کے دوران بجلی کمپنی کا مطالبہ کیا گیا تھا،نواز شریف نے اپنے دور حکومت میں بجلی کے منصوبوں کو تیزی سے مکمل کرایا، مسلم لیگ ن کے دور میں 11 ہزار میگاواٹ بجلی کے منصوبے لگائے گئے، ماضی کی حکومت نے مجرمانہ غفلت کی،عمران خان نے اپنے دور حکومت انتقامی کارروائیاں اورگالم گلوچ کی، ان کو عوامی مسائل کے حل میں کوئی دلچسپی نہیں، انہوں نے اپنے دور حکومت میں اس ملک کی عوام کو کچھ نہیں دیا، انہوں نے عوامی ترقی کے لئے ایک اینٹ نہیں لگائی۔
وزیراعظم نے مزید کہا کہ جنرل باجوہ نے عمران خان کے لیے جو کچھ کیا وہ اب سامنے آرہا ہے،عمران خان آج اقتدار پر بٹھانے والوں پر الزامات لگا رہے ہیں، عمران خان بطور وزیر اعظم ناکام ہوئے، عمران خان کی بدقسمتی ہے کہ وہ 4 سال مکمل سپورٹ ملنے کے بعد بھی ناکام ہوئے، عمران خان کو کامیاب کرنے کے لیے اداروں نے ہر قسم کی صلاحیت استعمال کی جبکہ جنرل (ر) قمر جاوید باجوہ نے عمران خان کی کس طرح مدد کی وہ سب کے سامنے آ رہا ہے لیکن اس سے مجھے کوئی سروکار نہیں، گزشتہ حکومت نے ہر معاملے میں مجرمانہ غفلت کی، عمران خان اپنا ایک کارنامہ بتانے کے قابل نہیں، عمران خان نے صرف معاشرے کو خراب کیا ہے، ان سے زیادہ منافق اور ناشکرا شخص نہیں دیکھا، 4 سال تک تمام اداروں نے عمران خان کی سپورٹ کی، عمران نیازی کوعوام سے کوئی لگاو¿ نہیں ہے، دوست ممالک نے ہر برے وقت میں پاکستان کا ساتھ دیا، عمران خان نے دوست ممالک کو ناراض کردیا، اندازہ نہیں تھا کہ عمران خان نے ہر چیز تباہ کردی ہے، عمران نیازی نے سی پیک کا جنازہ نکال دیا، چینی کمپنیوں پر کرپشن کے بے بنیاد الزامات لگائے گئے، چین ہمارے ملک میں 30 ارب ڈالر کی سرمایہ کاری کررہا ہے، شکریہ ادا کرنے کے بجائے چین پر الزامات لگائے، آئی ایم ایف سے معاہدے کو نقصان پہنچانے کی کوشش کی گئی، جنیوا میں خیبر پختونخوا کے سیلاب متاثرین کا مقدمہ پیش کرنا ہے، عمران خان نے پاکستان کو ڈیفالٹ کے دہانے پر پہنچا دیا ہے ۔
