نئی دہلی(مانیٹرنگ ڈیسک)ہندوستان کی معروف ائیر لائن ایئر انڈیا کی پرواز میں خاتون پر پیشاب کرنے والے ملزم شنکر مشرا کو پولیس نے گرفتار کر لیا ۔
بھارتی میڈیا کی رپورٹ کے مطابق ملزم شنکر مشرا کو گرفتار کرنے کے بعد دہلی لایا گیا ، ملزم کافی عرصے سے مفرور تھا اور پولیس نے اسے اشتہاری قرار دیا ہوا تھا۔ خیال رہے کہ 26 نومبر کو جب ایئر انڈیا کی پرواز نیویارک سے دہلی آ رہی تھی، اس وقت طیارے کی بزنس کلاس میں سفر کر رہے شنکر مشرا نے 70 سالہ بزرگ خاتون پر پیشاب کر دیا تھا۔ پولیس نے ملزم کے خلاف آئی پی سی کی دفعہ 354، 294، 509 اور 510 کے تحت مقدمہ درج کیا ہے۔شنکر مشرا کے موبائل کی آخری لوکیشن بنگلورو تھی، اسی بنیاد پر اس کی تلاش کی جا رہی تھی۔ دہلی پولیس کا کہنا ہے کہ 3 جنوری کو شنکر مشرا (35) کا موبائل فون بنگلور میں لوکیٹ ہوا تھا تاہم اس کے بعد سے اس کا فون بند ہو گیا، دہلی پولیس نے کئی ٹیمیں ممبئی بھیجی تھیں لیکن وہاں اس کا سراغ نہیں لگایا جا سکا۔معاملے نے جب طول پکڑ لیا تو ملزم شنکر مشرا کو ان کی کمپنی ویلز فارگو نے ملازمت سے فارغ کر دیا تھا۔ کمپنی نے ایک بیان جاری کرتے ہوئے کہا کہ ویلز فارگو اپنے ملازمین سے پیشہ ورانہ اور ذاتی طور پر حسن سلوک سے پیش آنے کی توقع رکھتی ہے۔ ہمیں یہ الزامات بہت پریشان کن لگے۔ اس شخص کو ویلز فارگو سے برطرف کر دیا گیا ہے، ہم اس معاملے کی تحقیقات میں مکمل تعاون کر رہے ہیں۔ شنکر مشرا ویلز فارگو کمپنی میں وائز پریزیڈنٹ کے عہدے پر فائز تھا۔ یہ کمپنی امریکہ کی ایک کثیر القومی مالیاتی خدمات کارپوریشن سے وابستہ ہے۔قبل ازیں، قومی کمیشن برائے خواتین نے بھی اس معاملے پر نوٹس لیتے ہوئے سخت کارروائی کا مطالبہ کیا تھا ۔
